India On Russia Oil। भारत सरकारच्या परराष्ट्र मंत्रालयाने अमेरिका आणि युरोपियन युनियनने भारतावर केलेल्या टीकेला जोरदार प्रत्युत्तर दिले आहे. रशियाकडून तेल खरेदी करण्याबाबत ही टीका केली जात होती, परंतु भारताने ती अन्याय्य आणि निराधार असल्याचे म्हटले आहे. परराष्ट्र मंत्रालयाचे प्रवक्ते रणधीर जयस्वाल यांनी अधिकृत निवेदन जारी करून, भारताला लक्ष्य करणे केवळ चुकीचेच नाही तर या देशांच्या स्वतःच्या शब्द आणि कृतीतील फरक देखील उघड करते” असे म्हणत पलटवार केला आहे.

परराष्ट्र मंत्रालयाचे प्रवक्ते रणधीर जयस्वाल यांनी प्रसिद्ध केलेल्या निवेदनात, “युक्रेन संघर्ष सुरू झाल्यानंतर पारंपारिक पुरवठादारांनी त्यांचा पुरवठा युरोपकडे वळवल्यामुळे भारताला रशियाकडून तेल आयात करण्यास भाग पाडले गेले. त्यावेळी, जागतिक ऊर्जा बाजार स्थिर राहावा यासाठी अमेरिकेनेच भारताला अशी पावले उचलण्यास प्रोत्साहित केले होते.” असे म्हटले आहे. तसेच पुढे या निवेदनात, “भारतीय ग्राहकांना स्वस्त आणि स्थिर ऊर्जा मिळावी यासाठी भारताची ही आयात आवश्यक आहे. हा पर्याय नाही तर जागतिक बाजारपेठेची सक्ती आहे.” असे म्हणत भारताची बाजू स्पष्ट केली.  एमईएने म्हटले आहे की, आश्चर्यकारक गोष्ट अशी आहे की भारतावर टीका करणारे देश स्वतः रशियासोबत व्यवसाय करत आहेत, उलट त्यांच्यासाठी राष्ट्रीय अत्यावश्यकता नाही.” असे म्हणत भारतावरील टीकेला सडेतोड उत्तर देण्यात आले आहे.

युरोपियन युनियनचा रशियासोबतही व्यवसाय  India On Russia Oil। 

भारताने आकडेवारीसह मांडणी करताना, २०२४ मध्येच युरोपियन युनियन (EU) आणि रशियामधील वस्तूंचा व्यापार ६७.५ अब्ज युरो होता, तर २०२३ मध्ये सेवांमधील व्यापार १७.२ अब्ज युरोपर्यंत पोहोचला. हा व्यापार त्या वर्षी भारत आणि रशियामधील एकूण व्यापारापेक्षा खूपच जास्त होता. युरोपियन युनियनने २०२४ मध्ये रशियाकडून १६.५ दशलक्ष टन एलएनजी (द्रवी नैसर्गिक वायू) आयात केला, जो २०२२ मध्ये १५.२१ दशलक्ष टनांचा मागील विक्रमही मागे टाकला.

अमेरिकेचे पितळ उघड

परराष्ट्र मंत्रालयाच्या प्रवक्त्याने सांगितले की, “युरोप आणि रशियामधील व्यापार केवळ ऊर्जेपुरता मर्यादित नाही, तर त्यात खते, खनिज उत्पादने, रसायने, लोह-पोलाद, यंत्रसामग्री आणि वाहतूक उपकरणे यांचा समावेश आहे. त्याच वेळी, अमेरिकेबाबत, भारताने म्हटले की ते रशियाकडून अणुऊर्जेसाठी युरेनियम हेक्साफ्लोराइड, त्याच्या ईव्ही उद्योगासाठी पॅलेडियम, खते तसेच रसायने देखील आयात करते.

भारताची भूमिका स्पष्ट   India On Russia Oil। 

परराष्ट्र मंत्रालयाने भर दिला की, भारताला लक्ष्य करणे बेकायदेशीर आणि अवास्तव आहे. भारत, एक प्रमुख अर्थव्यवस्था म्हणून, नेहमीच आपल्या राष्ट्रीय हिताचे आणि आर्थिक सुरक्षेचे रक्षण करण्यासाठी आवश्यक पावले उचलेल.

ट्रम्प यांनी शुल्क वाढवण्याची धमकी दिली होती

भारताच्या या विधानापूर्वी, ट्रम्प म्हणाले होते की भारत रशियाकडून मोठ्या प्रमाणात तेल खरेदी करत नाही तर खरेदी केलेल्या तेलाचा मोठा भाग आंतरराष्ट्रीय बाजारात विकून मोठा नफा देखील कमवत आहे. रशियाचे युद्धयंत्र युक्रेनमध्ये किती लोक मारत आहे याची त्यांना पर्वा नाही. म्हणूनच मी भारताने अमेरिकेला दिलेला शुल्क वाढवीन.