नवी दिल्ली  – अमेरिकेने 50% आयात शुल्क लावल्यामुळे भारतातून निर्यात होणार्‍या कापडा व कपड्यांची अमेरिकेला निर्यात कमी होणार आहे. अशा परिस्थितीत या निर्यातीवर परिणाम होऊ नये यासाठी भारत सध्या 40 देशाच्या संपर्कात आहे. पर्यायी बाजारपेठ शक्य तितक्या लवकर मिळावी यासाठी वाणिज्य मंत्रालय प्रयत्न करीत आहे.

प्रत्येक देशाबरोबर किती निर्यात करता येईल याची आकडेमोड करण्यात येत आहे. या देशांना दर्जेदार हरित ऊर्जा वापरून तयार केलेले कपडे पूरविण्याचे आश्वासन देण्यात येणार आहे. यासाठी संबंधित देशातील राजदूत कामाला लागले आहेत असे वाणिज्य मंत्रालयातील अधिकार्‍यांनी सांगितले.

भारतीय कापड आणि कपड्याची निर्यात अगोदरच जगातील 220 देशांना होत आहे. मात्र यातील 40 देश महत्वपूर्ण आहेत. या देशावर सध्या भर देण्यात येत आहे. या चाळीस देशातून 590 अब्ज डॉलर्सच्या कपड्याची आयात केली जाते. यामुळे या देशांमध्ये भारतीय निर्यातदारांना जास्त संधी आहेत. या 590 अब्ज डॉलरच्या बाजारपेठेत भारताचा वाटा केवळ पाच ते सहा टक्के आहे. तो वाढविण्यासाठी प्रयत्न करण्यात येणार आहे.

वाणिज्य मंत्रालयाच्या मदतीने निर्यातदारांच्या संघटनाचा जागतिक व्यापार प्रदर्शनामध्ये भाग घेऊन भारतीय उत्पादनांचे सादरीकरण करणार आहेत. ज्या देशाबरोबर मुक्त व्यापार करणार झाले आहेत अशा देशांमध्ये भारतीय उत्पादनाची विक्री वाढविण्यासाठी प्रयत्न करण्यात येणार असल्याचे सांगण्यात आले. ज्या प्रमुख देशाशी भारत संपर्कात आहे, त्यामध्ये ब्रिटन, जपान, दक्षिण कोरिया, जर्मनी, फ्रान्स, इटली, स्पेन, नेदरलँड, पोलंड, कॅनडा, मेक्सिको, रशिया, बेल्जियम, तुर्कीये, ऑस्ट्रेलियाचा समावेश आहे.

निर्यातीत भारत 6 व्या क्रमांकावर
2024 मध्ये भारतात कापड आणि कपड्याचे 179 अब्ज डॉलरचे उत्पादन झाले होते. त्यातील 142 अब्ज डॉलरचे कपडे देशांतर्गत बाजारपेठेसाठी होते तर 37 अब्ज डॉलरच्या कपड्याची निर्यात झाली होती. यामध्ये अमेरिकेचा बराच वाटा होता. मात्र आता या निर्यातीवर परिणाम होण्याची शक्यता आहे. 2024 मध्ये जागतिक कापड बाजारपेठ 800.77 अब्ज डॉलरची होती. यामध्ये भारताचा वाटा 4.1% असून भारत कापडाच्या निर्यात दारामध्ये सहाव्या क्रमांकावर आहे. या क्षेत्रात भारताला आगेकुच करण्याची संधी आहे.