Indapur Rasta Roko – शेतकरी कर्जमाफीच्या मागणीसाठी आमदार रोहित पवार यांनी सुरू केलेल्या अन्नत्याग आंदोलनाला पाठिंबा दर्शवत महाविकास आघाडीच्या वतीने शनिवारी पुणे-सोलापूर राष्ट्रीय महामार्गावर रास्ता रोको आंदोलन करण्यात आले. विशेष म्हणजे राज्याचे कृषिमंत्री दत्तात्रय भरणे यांचा इंदापूर तालुका असलेल्या ठिकाणीच हे आंदोलन झाल्याने त्याची राजकीय वर्तुळात मोठी चर्चा रंगली आहे.

शेतकऱ्यांच्या वाढत्या आर्थिक अडचणी, नापिकी, कर्जबाजारीपणा आणि शासनाच्या कथित उदासीनतेच्या निषेधार्थ महाविकास आघाडीतील शिवसेना (उद्धव बाळासाहेब ठाकरे), राष्ट्रवादी काँग्रेस (शरदचंद्र पवार पक्ष) आणि काँग्रेस पक्षाच्या पदाधिकाऱ्यांनी व कार्यकर्त्यांनी एकत्र येत आंदोलन छेडले. आंदोलकांनी काही काळ पुणे–सोलापूर राष्ट्रीय महामार्गावरील वाहतूक रोखून राज्य सरकारचे लक्ष शेतकऱ्यांच्या प्रश्नांकडे वेधण्याचा प्रयत्न केला.

महाराष्ट्रातील महाविकास आघाडीचे हे पहिले रास्ता रोको आंदोलन असल्याचा दावा आंदोलकांनी केला. “शेतकऱ्यांना तत्काळ कर्जमाफी द्या”, “शेतकरी वाचवा” अशा घोषणांनी परिसर दणाणून गेला. राज्यातील शेतकरी अडचणीत असताना सरकारने ठोस निर्णय घेणे आवश्यक असून शेतकऱ्यांच्या मागण्यांसाठी संघर्ष अधिक तीव्र करण्याचा इशाराही आंदोलकांनी यावेळी दिला. आमदार रोहित पवार यांच्या आंदोलनाला पाठिंबा देण्यासाठी विरोधी पक्षातील विविध नेते, पदाधिकारी आणि शेतकरी मोठ्या संख्येने एकत्र आल्याने आंदोलनाला व्यापक स्वरूप प्राप्त झाले.

कृषिमंत्री दत्तात्रय भरणे यांच्या तालुक्यातच शेतकरी व नागरिकांना रस्त्यावर उतरून आंदोलन करण्याची वेळ आल्याची टीकाही यावेळी करण्यात आली. या आंदोलनात ॲड. राहुल मखरे, नितीन शिंदे, निवास शेळके, तानाजी भोंग, ज्ञानदेव भोसले, महादेव सोमवंशी, छाया पडसळकर, रेश्मा शेख, किसान जावळे, हमीद आतार, काकासाहेब तसेच महादेव चव्हाण यांच्यासह महाविकास आघाडीचे अनेक पदाधिकारी, कार्यकर्ते व शेतकरी सहभागी झाले होते.

“शेतकऱ्यांच्या प्रश्नावर सर्व विरोधक एकत्र”
आमदार रोहित पवार यांच्या अन्नत्याग आंदोलनाला पाठिंबा देण्यासाठी महाविकास आघाडीतील तिन्ही पक्षांचे पदाधिकारी, कार्यकर्ते आणि शेतकरी एकत्र आल्याचे चित्र इंदापुरात पाहायला मिळाले. शेतकरी कर्जमाफीचा निर्णय होईपर्यंत आंदोलनाची धार कायम ठेवण्याचा निर्धार यावेळी व्यक्त करण्यात आला.