Sangli Satara MLC Election – सांगली-सातारा स्थानिक स्वराज्य संस्था मतदारसंघाच्या विधान परिषद निवडणुकीत महाविकास आघाडीच्या उमेदवारीबाबतचा संभ्रम अखेर दूर झाला आहे. राष्ट्रवादी काँग्रेसचे (शरद पवार गट) अधिकृत उमेदवार म्हणून अभयसिंह खाशेराव जगताप यांची उमेदवारी मान्य करण्यात आली आहे.

पक्षाकडून एबी फॉर्म सादर केल्यामुळे त्यांचा अर्ज अधिकृत ठरला असून बाळासाहेब ऊर्फ प्रताप पाटील हे अपक्ष उमेदवार म्हणून निवडणुकीच्या मैदानात राहणार आहेत. निवडणूक प्रक्रियेअंतर्गत मंगळवारी अर्जांची छाननी पार पडली. यामध्ये एकूण आठ उमेदवारांनी दाखल केलेल्या अर्जांपैकी सात उमेदवारांचे अकरा अर्ज वैध ठरले. अपक्ष उमेदवार सीमा सुनील पोतदार यांच्या दोन्ही अर्जांमध्ये आवश्यक कागदपत्रे आणि शपथपत्राची पूर्तता नसल्याने ते फेटाळण्यात आले.

छाननीनंतर वैध ठरलेल्या उमेदवारांमध्ये महायुतीचे धैर्यशील ज्ञानदेव कदम, महाविकास आघाडीचे अभयसिंह खाशेराव जगताप यांच्यासह प्रताप धोंडिराम पाटील, मयूर बाबासाहेब पाटील, संजय नायकू मेढे, तानाजी भगवान पाटील आणि किशोर हणमंत धुमाळ यांचा समावेश आहे. दरम्यान, किशोर धुमाळ यांच्या अर्जावरील काही सह्यांबाबत हरकती नोंदवण्यात आल्या होत्या. संबंधित सुनावणीनंतर निवडणूक निर्णय अधिकारी डॉ. मैनाक घोष यांनी त्यांचा अर्ज वैध असल्याचा निर्णय दिला.

या मतदारसंघात सातारा जिल्ह्यातील 423 आणि सांगली जिल्ह्यातील 472 असे एकूण 895 मतदार मतदानाचा हक्क बजावणार आहेत. उमेदवारी अर्ज मागे घेण्याची अंतिम तारीख 4 जून असून त्यानंतर निवडणुकीचे चित्र अधिक स्पष्ट होणार आहे. सध्या तरी महायुतीचे धैर्यशील कदम आणि महाविकास आघाडीचे अभयसिंह जगताप यांच्यात थेट सामना रंगण्याची चिन्हे दिसत आहेत.