IND vs NZ head to head record : आयसीसी चॅम्पियन्स ट्रॉफी २०२५ चा अंतिम सामना रविवारी दुबई येथे भारत आणि न्यूझीलंड यांच्यात खेळला जाणार आहे. आठ वर्षांनंतर खेळल्या जाणाऱ्या या स्पर्धेत विजय मिळवण्यासाठी दोन्ही संघ सर्वतोपरी प्रयत्न करतील. २०१७ मध्ये, जेव्हा ही स्पर्धा शेवटची खेळली गेली होती, तेव्हा पाकिस्तानने अंतिम सामन्यात भारताला हरवून जेतेपद पटकावले होते. टीम इंडिया पुन्हा एकदा अंतिम फेरीत पोहोचली आहे, पण यावेळी विरोधी संघ वेगळा आहे. सलग तीन वेळा चॅम्पियन्स ट्रॉफीच्या अंतिम फेरीत पोहोचणारा भारत पहिला संघ ठरला.

भारत विरुद्ध न्यूझीलंड हेड टू हेड रेकॉर्ड –

भारत आणि न्यूझीलंड यांच्यातील हेड टू हेड रेकॉर्डमध्ये टीम इंडियाचा वरचष्मा राहिला आहे. दोघांमधील एकूण ११९ सामन्यांपैकी भारताने ६१ सामने जिंकले आहेत, तर ब्लॅककॅप्सने ५० सामने जिंकले आहेत. एक सामना बरोबरीत सुटला. सात सामने अनिर्णीत राहिले. आयसीसी स्पर्धांमध्ये दोन्ही संघांमध्ये समान स्पर्धा राहिली आहे. आयसीसी स्पर्धांमध्ये दोघेही १२ वेळा एकमेकांसमोर आले आहेत. भारत आणि न्यूझीलंड दोघांनीही प्रत्येकी सहा सामने जिंकले आहेत.

एकदिवसीय विश्वचषकातील दोन संघाचा रेकॉर्ड –

एकदिवसीय विश्वचषकात दोन्ही संघ १० वेळा एकमेकांसमोर आले आहेत. यापैकी भारत आणि न्यूझीलंड दोघांनीही प्रत्येकी पाच सामने जिंकले आहेत. तर, चॅम्पियन्स ट्रॉफीच्या दोन सामन्यांमध्ये भारत आणि न्यूझीलंडने प्रत्येकी एक सामना जिंकला आहे. यंदा भारत आणि न्यूझीलंड एकाच गटात होते. जेव्हा दोघेही गट फेरीत एकमेकांशी भिडले तेव्हा भारताने ४४ धावांनी विजय मिळवला होता.

मागील सहा वनडेतील रेकॉर्ड –

दोघांमधील गेल्या सहा एकदिवसीय सामन्यांमध्ये टीम इंडियाने सलग सहा विजय मिळवले आहेत. ही मालिका १८ जानेवारी २०२३ रोजी सुरू झाली होती, जी आतापर्यंत सुरू आहे. भारताने उपांत्य फेरीत एकदिवसीय विश्वविजेत्या ऑस्ट्रेलियावर चार विकेट्सने विजय मिळवून अंतिम फेरीत आपले स्थान निश्चित केले होते, तर २००० च्या विजेत्या न्यूझीलंडने, जो ग्रुप अ मध्ये दुसऱ्या क्रमांकावर होता, लाहोरमध्ये दक्षिण आफ्रिकेचा पराभव केला.