IND vs NZ 3rd ODI : पावसाचा सलग तिसऱ्या सामन्यात धुमाकूळ! हॅमिल्टन वनडे रद्द होताच भारताला थेट मोठा फायदा; पाहा नवे समीकरण
IND vs NZ 3rd ODI : भारत आणि न्यूझीलंड यांच्यातील तिसरा एकदिवसीय सामना पावसामुळे रद्द करण्यात आला आहे. हॅमिल्टन येथे होणारा हा सामना सततच्या पावसामुळे सुरू होऊ शकला नाही.
IND vs NZ 3rd ODI Abandoned Due To Rain Hamilton Seddon Park : भारत आणि न्यूझीलंड यांच्यातील पाच एकदिवसीय सामन्यांच्या मालिकेतील तिसरा सामना मुसळधार पावसामुळे रद्द करावा लागला आहे. हॅमिल्टन येथील सेडन पार्क मैदानावर मंगळवारी (१० नोव्हेंबर) सकाळपासून सुरू असलेल्या संततधार पावसामुळे अखेर एकाही चेंडूचा खेळ न होता सामना रद्द घोषित करण्यात आला. पावसामुळे तब्बल दोन तास उशिरा नाणेफेक पार पडली. नाणेफेक जिंकून भारतीय कर्णधार शुबमन गिलने प्रथम गोलंदाजीचा निर्णय घेतला होता. सामना ४०-४० षटकांचा करण्यात आला होता, मात्र नाणेफेक संपताच पुन्हा मुसळधार पाऊस सुरू झाल्याने अखेर सामना थांबवावा लागला.
मैदानाची वारंवार पाहणी; अखेर पंचांचा सामना रद्दचा निर्णय –
सुरुवातीला पावसाचा जोर कमी होता, परंतु काही वेळातच पावसाने रौद्ररूप धारण केले. खेळपट्टी झाकून ठेवण्यात आली होती आणि पंचांनी मैदानाची अनेक वेळा पाहणी केली. सामना संपण्यासाठी पुरेसा अवधी शिल्लक होता; तरीही दिवसभर पाऊस सुरू राहण्याचा हवामान खात्याचा अंदाज असल्याने अखेर सामना रद्द करण्यात आला. भारतीय संघाकडे हा सामना जिंकून मालिका खिशात घालण्याची उत्तम संधी होती, मात्र पावसाने ती हुकवली. आता मालिकेतील चौथा सामना शुक्रवार, १३ नोव्हेंबर रोजी माऊंट माउंगानुई येथे रंगणार आहे.
मालिकेतील तिन्ही सामन्यांवर पावसाचे सावट; डकवर्थ लुईसचा खेळ
𝗨𝗽𝗱𝗮𝘁𝗲 𝗳𝗿𝗼𝗺 𝗛𝗮𝗺𝗶𝗹𝘁𝗼𝗻:
The third New Zealand-India ODI is called off due to rain.
#TeamIndia | #NZvIND https://t.co/LtrfDalRcz
— BCCI (@BCCI) November 10, 2026
या मालिकेतील तिन्ही सामन्यांमध्ये पावसाचा खोडा पाहायला मिळाला आहे. ऑकलंडमधील पहिला सामना पावसामुळे ३२ षटकांचा झाला होता, ज्यात भारताने १४३ धावांचे लक्ष्य ५ गडी गमावून पार केले. त्यानंतर वेलिंग्टन येथे झालेल्या दुसऱ्या लढतीत न्यूझीलंडचा संघ १३४ धावांवर गारद झाला होता; भारताने ११३ धावा केल्या असताना पुन्हा मुसळधार पाऊस आला आणि डकवर्थ लुईस (DLS) नियमानुसार भारताने ४ धावांनी थरारक विजय मिळवला होता.
हेही वाचा – IND vs NZ : भारत-न्यूझीलंड तिसरा वनडे सामने रद्द होणार? नेमकं कारण काय? जाणून घ्या
टीम इंडियाची २-० ने अजेय आघाडी; मालिका पराभवाचे सावट टळले
तिसरा सामना रद्द झाल्याने भारतीय संघाने या पाच सामन्यांच्या मालिकेत २-० अशी अजेय आघाडी कायम ठेवली आहे. येथून भारतीय संघाला ही मालिका गमावण्याचा धोका पूर्णपणे टळला आहे. न्यूझीलंडला आता केवळ मालिका बरोबरीत सोडवण्याची संधी शिल्लक असून, टीम इंडियाला उर्वरित दोन सामन्यांपैकी फक्त एक विजय मिळवून मालिका विजयावर अधिकृतपणे शिक्कामोर्तब करायचे आहे.
