IND vs ENG : भारतीय क्रिकेट नियामक मंडळाने इंग्लंडविरुद्ध आगामी काळात होणाऱ्या तीन सामन्यांच्या एकदिवसीय मालिकेसाठी (IND vs ENG) 15 सदस्यीय भारतीय संघाची घोषणा केली आहे.

या संघात (IND vs ENG) अनेक मोठे फेरबदल पाहायला मिळत असून, अनुभवी फलंदाज विराट कोहली आणि मुख्य वेगवान गोलंदाज जसप्रीत बुमराह यांचे संघात पुनरागमन झाले आहे. मात्र, दुसरीकडे निवड समितीने एका धक्कादायक निर्णयाने सर्वांनाच चकित केले आहे. नुकतेच अफगाणिस्तानविरुद्धच्या सामन्यात शानदार शतक झळकावणाऱ्या युवा यशस्वी जयस्वालला संघातून वगळण्यात आले आहे.

विराट कोहलीचे पुनरागमन, पण…

इंग्लंडविरुद्धच्या मालिकेत स्टार फलंदाज विराट कोहली खेळणार की नाही, याबाबत क्रिकेट वर्तुळात बरीच चर्चा सुरू होती. अखेर बीसीसीआयने त्याला संघात स्थान दिले आहे. मात्र, त्याचा या मालिकेतील (IND vs ENG) सहभाग त्याच्या तंदुरुस्तीवर अवलंबून असेल.

आयपीएल २०२६ च्या अंतिम सामन्यात विराटला हॅमस्ट्रिंगची (स्नायूंची) दुखापत झाली होती, ज्यामुळे त्याला अफगाणिस्तानविरुद्धच्या मालिकेला मुकावे लागले होते. सूत्रांच्या माहितीनुसार, विराटला २२ जून रोजी ‘सेंटर ऑफ एक्सलन्स’ मध्ये आपली तंदुरुस्ती चाचणी द्यावी लागेल, ज्यानंतरच त्याच्या खेळण्यावर अंतिम शिक्कामोर्तब होईल.

3 वर्षांनंतर जसप्रीत बुमराहची वनडे संघात एन्ट्री

भारतीय संघाचा हुकमी एक्का जसप्रीत बुमराह चाहत्यांसाठी एक मोठी आनंदाची बातमी घेऊन आला आहे. तब्बल तीन वर्षांच्या प्रदीर्घ अंतरानंतर बुमराहचे एकदिवसीय संघात पुनरागमन होत आहे. २०२३ च्या एकदिवसीय विश्वचषक अंतिम सामन्यानंतर तो एकही ५० षटकांचा सामना खेळलेला नाही. त्यामुळे तब्बल तीन वर्षांनंतर बुमराह पुन्हा एकदा वन-डे फॉरमॅटमध्ये आपली गोलंदाजीची धार दाखवण्यासाठी सज्ज झाला आहे.

शतक झळकावूनही यशस्वी जयस्वाल संघाबाहेर; निवड समितीचा धक्कादायक निर्णय

या संघ निवडीतील सर्वात आश्चर्यकारक आणि वादग्रस्त ठरणारा निर्णय म्हणजे यशस्वी जयस्वालला संघातून वगळणे. अफगाणिस्तानविरुद्ध शतक झळकावून २४ तास उलटत नाहीत तोच यशस्वीला हा धक्का बसला आहे. वास्तविक, विराट कोहली दुखापतग्रस्त झाल्यानंतर यशस्वीचा संघात समावेश करण्यात आला होता. चेन्नई येथे खेळल्या गेलेल्या शेवटच्या एकदिवसीय सामन्यात त्याने केवळ ८६ चेंडूंत ११० धावांची नाबाद आणि मॅच-विनिंग खेळी केली होती. तरीही त्याला इंग्लंड दौऱ्याचे तिकीट मिळालेले नाही.

‘या’ खेळाडूंना डच्चू

अफगाणिस्तानविरुद्धच्या मालिकेत भारतीय संघाचा हिस्सा असलेले यशस्वी जयस्वाल, हर्ष दुबे आणि प्रिन्स यादव हे तीन खेळाडू इंग्लंड दौऱ्यावर जाणार नाहीत. याशिवाय, वरिष्ठ खेळाडू मोहम्मद सिराज आणि अष्टपैलू हार्दिक पांड्या यांनाही या १५ सदस्यीय संघात स्थान मिळालेले नाही.

मालिकेचे वेळापत्रक
भारत आणि इंग्लंड यांच्यातील एकदिवसीय मालिका १४ जुलैपासून इंग्लंडमध्ये सुरू होणार आहे:

पहिला एकदिवसीय सामना: १४ जुलै – बर्मिंगहॅम
दुसरा एकदिवसीय सामना: १६ जुलै – कार्डिफ
तिसरा व अंतिम सामना: १९ जुलै – लॉर्ड्स (लंडन)

इंग्लंड दौऱ्यासाठी 15 सदस्यीय भारतीय संघ

शुभमन गिल (कर्णधार), रोहित शर्मा, विराट कोहली, श्रेयस अय्यर, केएल राहुल, ईशान किशन, वॉशिंग्टन सुंदर, अक्षर पटेल, नितीश कुमार रेड्डी, कुलदीप यादव, जसप्रीत बुमराह, प्रसिद्ध कृष्णा, हर्षित राणा, अर्शदीप सिंग, गुरनूर ब्रार.