Yashasvi Jaiswal broke Sunil Gavaskar’s old record : ग्रीन पार्क, कानपूर येथे खेळल्या गेलेल्या बांगलादेश विरुद्धच्या मालिकेतील दुसऱ्या कसोटी सामन्यात भारताचा युवा सलामीवीर यशस्वी जैस्वालने अप्रतिम कामगिरी केली. त्याला सामनावीर म्हणून देखील निवडण्यात आले. जैस्वालने पहिल्या डावात 51 चेंडूत 72 धावांची तर दुसऱ्या डावात 45 चेंडूत 51 धावांची शानदार खेळी केली. भारताच्या सात विकेट्सने विजय मिळवण्यात या खेळींनी महत्त्वाची भूमिका बजावली.

जैस्वालने या संपूर्ण वर्षात अप्रतिम कामगिरी केली आहे. या कसोटी सामन्यात आपल्या अप्रतिम खेळाच्या जोरावर त्याने सुनील गावस्कर यांचा विक्रम मोडीत काढला. 23 वर्षांचा होण्यापूर्वी एका कॅलेंडर वर्षात सर्वाधिक धावा करणारा तो भारतीय खेळाडू ठरला. गावसकर यांनी 1971 मध्ये वयाची 23 वर्षे पूर्ण होण्यापूर्वी 918 धावा केल्या होत्या.

जैस्वालचे वय सध्या 22 वर्षे 278 दिवस इतके आहे. आणि त्याने यावर्षी कसोटीत 929 धावा केल्या आहेत. भारताला या वर्षी अजून सात कसोटी सामने खेळायचे आहेत आणि अशा स्थितीत जयस्वालच्या खात्यात आणखी अनेक धावा जमा होऊ शकतात. जैस्वालने 2024 मध्ये 66.35 च्या सरासरीने 929 धावा केल्या आहेत. यात दोन शतके आणि सहा अर्धशतकांचा समावेश आहे. यावरून जयस्वाल यांच्या कामगिरीत सातत्य स्पष्टपणे दिसून येते. दरम्यान, भारताची पुढची कसोटी मालिका 16 आॅक्टोबर ते 5 नोव्हेंबर दरम्यान न्यूझीलंडविरुद्ध आहे. तीन सामन्यांच्या कसोटी मालिकेत यशस्वी जैस्वालच्या कामगिरीकडे सर्वांचे लक्ष असेल.

IND vs BAN : रोहितच्या नेतृत्वाखाली भारताचा ‘विराट’ पराक्रम, बांगलादेशला क्लीन स्वीप देत केला अविश्वसनीय विक्रम…

सेहवागसोबत बरोबरी…

तसेच कानपूरमधील दुसऱ्या कसोटी सामन्यात, जैस्वालने दोन्ही डावात 50 हून अधिक धावा किंवा 100 हून अधिक स्ट्राइक रेटनं धावा काढल्या. यासह अशी कामगिरी करणारा तो दुसरा भारतीय फलंदाज ठरला आहे. याआधी सेहवागने अशी कामगिरी केली होती. त्याने 2011 मध्ये दिल्लीत वेस्ट इंडिजविरुद्ध 46 चेंडूत 55 आणि 55 चेंडूत 55 धावा केल्या होत्या.