Border-Gavaskar Trophy 2024/25 (Virat Kohli) : भारत आणि ऑस्ट्रेलिया यांच्यात खेळल्या जाणाऱ्या 5 सामन्यांच्या कसोटी मालिकेचे काउंटडाऊन सुरू झाले आहे. या मालिकेतील पहिला सामना 22 नोव्हेंबरला पर्थमध्ये होणार आहे. या सामन्यासाठी टीम इंडिया जोरदार तयारी करत आहे. पहिल्या कसोटी सामन्यात रोहित शर्माच्या खेळाबाबत साशंकता आहे. अशा परिस्थितीत सर्वांच्या नजरा विराट कोहलीवर खिळल्या आहेत. ऑस्ट्रेलियाविरुद्धच्या पहिल्या कसोटी सामन्यात तो मोठी खेळी खेळू शकेल, अशी चाहत्यांना आशा आहे. दरम्यान, एक मोठ्या विक्रमावर त्याचे लक्ष्य असणार आहे. विराट कोहली करू शकतो ‘हा’ विक्रम … पर्थ कसोटी सामन्यात विराट कोहलीला इतिहास रचण्याची संधी आहे. विराट कोहलीचा ऑस्ट्रेलियाविरुद्धचा विक्रमही उत्कृष्ट राहिला आहे. त्याने ऑस्ट्रेलियाविरुद्धच्या 24 कसोटी सामन्यांच्या 44 डावांमध्ये 47.48 च्या सरासरीने 2 हजार 042 धावा केल्या आहेत. या कालावधीत त्याने 8 शतके आणि 5 अर्धशतके केली आहेत. ऑस्ट्रेलियाविरुद्ध सर्वाधिक धावा करणारा तो 5वा फलंदाज आहे. जर विराट कोहलीने पर्थ कसोटी सामन्याच्या दोन्ही डावात 102 धावा केल्या तर तो भारताच्या दोन महान फलंदाजांचे विक्रम मोडेल. विराट कोहलीने पहिल्या कसोटी सामन्यात 33 धावा केल्या तर ऑस्ट्रेलियाविरुद्धच्या कसोटीत सर्वाधिक धावा करण्याच्या बाबतीत तो चेतेश्वर पुजाराला मागे टाकेल. पुजाराने ऑस्ट्रेलियाविरुद्धच्या कसोटीत 2 हजार 074 धावा केल्या आहेत. याशिवाय विराट कोहलीला राहुल द्रविडलाही मागे टाकण्याची मोठी संधी असेल. यासाठी त्याला 101 धावा कराव्या लागतील. द्रविडने ऑस्ट्रेलियाविरुद्ध 54 कसोटी डावात 2 हजार 143 धावा केल्या आहेत. सचिन तेंडुलकरच्या आहेत सर्वाधिक धावा… ऑस्ट्रेलियाविरुद्धच्या कसोटीत सर्वाधिक धावा करण्याचा विक्रम सचिन तेंडुलकरच्या नावावर आहे. सचिनने 74 कसोटी डावांमध्ये 3 हजार 630 धावा केल्या आहेत. या कालावधीत त्याने 11 शतके आणि 16 अर्धशतके झळकावली आहेत. T20 Cricket : विराट कोहलीचं रेकॉर्ड उद्ध्वस्त, पाक खेळाडूच्या रडारवर आता रोहित शर्मा… ऑस्ट्रेलियाविरुद्ध सर्वाधिक धावा करणारे भारतीय फलंदाज…. सचिन तेंडुलकर : 3,630 रन (74 डाव) व्ही.व्ही.एस लक्ष्मण : 2,434 रन (54 डाव) राहुल द्रविड : 2,143 रन (54 डाव) चेतेश्वर पुजारा : 2,074 रन (45 डाव) विराट कोहली : 2,042 रन (44 डाव)
