IND vs AFG Test : भारतीय कसोटी क्रिकेटमध्ये मोठा बदल! तब्बल १६ वर्षांनंतर पहिल्यांदाच मायदेशात असं घडणार
IND vs AFG Test : भारतीय संघ 6 जून रोजी मुल्लानपूर स्टेडियमवर अफगाणिस्तानविरुद्ध कसोटी खेळणार आहे, ज्यामध्ये टीम इंडिया प्रदीर्घ काळानंतर घरच्या मैदानावर नव्या फिरकी युनिटसह खेळणार आहे.
IND vs AFG Test Ashwin Jadeja Miss Home : भारतीय क्रिकेट संघ शनिवार, ६ जूनपासून आपल्या आगामी दीर्घ आंतरराष्ट्रीय हंगामाची सुरुवात करणार आहे. अफगाणिस्तानविरुद्धचा हा एकमेव कसोटी सामना न्यू चंदीगड येथील मुल्लानपूर स्टेडियमवर खेळवला जाणार आहे. यवा फलंदाज शुबमन गिलच्या कप्तानीखाली टीम इंडिया या सामन्यात उतरणार आहे. भारतामध्ये खेळल्या जाणाऱ्या कसोटी सामन्यांमध्ये फिरकीपटूंची भूमिका नेहमीच सर्वात महत्त्वाची असते. मात्र, या ऐतिहासिक सामन्यात भारतीय संघ एका अत्यंत दुर्मिळ आणि वेगळ्या समीकरणासह मैदानात उतरणार आहे, ज्याची गेल्या १६ वर्षांत कधीही पुनरावृत्ती झाली नव्हती.
१६ वर्षांनंतर अश्विन-जडेजा जोडी घरच्या मैदानावर गायब!
भारतीय फिरकीची सर्वात यशस्वी आणि दिग्गज जोडी रविचंद्रन अश्विन (Ravichandran Ashwin) आणि रवींद्र जडेजा (Ravindra Jadeja) या सामन्यात खेळताना दिसणार नाहीत. आर. अश्विनने २०२४ च्या अखेरीस ऑस्ट्रेलिया दौऱ्यानंतर आंतरराष्ट्रीय क्रिकेटमधून निवृत्ती जाहीर केली होती. तर दुसरीकडे, रवींद्र जडेजाला वर्कलोड मॅनेजमेंटअंतर्गत (विश्रांती) या मालिकेसाठी संघात स्थान देण्यात आलेले नाही.
तब्बल १६ वर्षांच्या प्रदीर्घ अंतरानंतर भारतीय संघ घरच्या मैदानावर अश्विन आणि जडेजा या दोघांशिवाय कोणताही कसोटी सामना खेळणार आहे. यापूर्वी २०१० मध्ये न्यूझीलंडविरुद्ध नागपूर येथे झालेल्या कसोटीत असे घडले होते, कारण तोपर्यंत या दोन्ही स्टार खेळाडूंनी कसोटी क्रिकेटमध्ये पदार्पणही केले नव्हते.
The red ball grind 🏏
📸 Snapshots from #TeamIndia‘s solid training session ahead of the #INDvAFG Test 💪@IDFCFIRSTBank pic.twitter.com/FAoqPshT8K
— BCCI (@BCCI) June 4, 2026
कुलदीप यादवच्या खांद्यावर धुरा; हर्ष की मानवला मिळणार संधी?
अश्विन-जडेजाच्या अनुपस्थितीत आता भारतीय फिरकी आक्रमणाचे नेतृत्व करण्याची संपूर्ण जबाबदारी चायनामन गोलंदाज कुलदीप यादवच्या (Kuldeep Yadav) खांद्यावर असणार आहे. या सामन्यात त्याचे खेळणे निश्चित मानले जात आहे. त्याच्या सोबतीला दुसरा मुख्य फिरकीपटू म्हणून पहिल्यांदाच मुख्य संघात निवड झालेल्या हर्ष दुबे आणि मानव सुथार यांच्यात चुरस पाहायला मिळणार आहे.
या दोघांपैकी एकाला पदार्पणाची (डेब्यू) संधी मिळू शकते. तर, तिसरा फिरकीचा पर्याय म्हणून अष्टपैलू खेळाडू वॉशिंग्टन सुंदर प्लेइंग इलेव्हनचा भाग असेल. गेल्या काही वर्षांत भारतीय फिरकीपटूंना घरच्या मैदानावर अपेक्षेप्रमाणे पूर्ण दबदबा दाखवता आलेला नाही, त्यामुळे या नव्या आणि युवा स्पिन युनिटच्या कामगिरीकडे संपूर्ण क्रिकेट जगताचे लक्ष लागून राहिले आहे.
