मुंबई : ग्रामविकास आणि पंचायतराज मंत्री जयकुमार गोरे हे एका महिलेला विवस्त्र फोटो पाठवत असल्याचा आरोप ठाकरे गटाचे खासदार संजय राऊत यांनी केला होता. या आरोपानंतर राज्याच्या राजकारणात मोठी खळबळ उडाली. अधिवेशानादरम्यान विरोधकांनी देखील सरकारवर टीका केली. त्यानंतर जयकुमार गोरे यांनी खासदार संजय राऊत, आमदार रोहित पवार तसेच एका युट्यूब चॅनलच्या पत्रकारावर विशेषाधिकार हक्कभंग आणला. यानंतर आता पीडित महिलेने केलेल्या दाव्याने जयकुमार गोरे यांच्या अडचणीत वाढ होण्याची शक्यता आहे.

आणखी एक महिला सर्व पुराव्यानिशी माध्यमांसमोर येणार असून त्या महिलेची कोणत्याही प्रकारे ओळख उघड करणार नसल्याचे त्या पीडित महिलेने सांगितले आहे. जयकुमार गोरे निर्दोष सुटणे अवघड होते. मी उपकार केल्यानेच तो सुटल्याचेही त्या पीडित महिलेने एका मराठी वृत्त वाहिनीशी बोलताना सांगितले आहे.

पीडित महिला नेमकं काय म्हणाली?

2015-16 दरम्यान मला जयकुमार गोरे अश्लील इमेजेस पाठवून व्हाट्सअपवर शिवीगाळ करून प्रचंड त्रास दिला आहे. याबाबत माफी मागण्यासाठी मी सांगितले होते. मात्र, त्यांनी माफी न मागितल्यामुळे 2017 मध्ये त्यांच्यावर न्यायालयीन खटला दाखल केला. या दरम्यान मला अनेक धमकीचे फोन देखील आले. मला या सहा वर्षांमध्ये अनेकदा मंत्र्यांच्या कार्यकर्त्यांनी त्रास दिला होता.

तरीही मी शांत होते. मला ज्यावेळी पत्र आलं तेव्हा मी मला त्रास होत असल्याने कलेक्टर ऑफिसला दिवसभर थांबून कलेक्टरांना ही सर्व हकीकत सांगितली होती. तसेच, पोलीस अधीक्षकांना देखील याबाबत माहिती दिली होती. मात्र, माझी कोणी दखल घेतली नाही किंवा या गोष्टीचा तपास करण्यासाठी पोलीस आले नाही. त्यामुळे मी 17 तारखेला माझी बदनामी होत असल्याने उपोषण करणार असल्याच्या निर्णयावर ठाम आहे असं त्या म्हणाल्या.

पुढे बोलताना म्हणाल्या, केस सुरू असल्यापासून मीडियासमोर मी कधी आले नव्हते. मात्र, मला खूप त्रास कार्यकर्ते देत असल्याने मी आज मीडियासमोर येऊन सर्व सांगत आहे. 2019 मध्ये जयकुमार गोरे निवडून आल्यानंतर या केसचा त्रास होत असल्यामुळे त्यांनी मला कोर्टामध्ये दंडवत घातला होता. मला लेखी माफीनामा घेऊन दिला होता. यामध्ये माझ्याकडून अशी चूक होणार नाही असा उल्लेख केला होता.

यामुळे मी ही केस 2019 मध्ये मागे घेतली होती. मी केस मागे घेतल्यामुळे तो निर्दोष मुक्त झाला. आत्ता 24 ते 25 जानेवारीच्या दरम्यान माझ्या नावाचे निनावी पत्र आले होते. तीन ते चार महिन्यापूर्वी माझी जुनी एफआयआर आहे ती माझ्या नावासह व्हाट्सअप ग्रुपवर व्हायरल होत होती, असंही पीडित महिला म्हणाली.

तसेच मंत्री जयकुमार गोरे यांनी मला फ्लॅट दिले, आम्ही दुबईला गेलो याविषयी अशी बदनामी करत होते. यामुळे मी गप्प बसले तर आणखी समस्येला सामोरे जावे लागेल म्हणून मी विधानभवनासमोर आंदोलनाचा इशारा दिला आहे. याबाबत मी राज्यपाल मुख्यमंत्र्यांना पत्र दिले आहेत आणि हा प्रकार थांबला पाहिजे हा माझा उद्देश आहे असं या पीडित महिलेने म्हटलं आहे.

जाणीवपूर्वक माझी बदनामी : जयकुमार गोरे

खासदार संजय राऊत यांनी माध्यमांसमोर येऊन जाणीवपूर्वक माझी बदनामी केली. त्यामुळे त्यांनी माझा व सभागृहाचा विशेषधिकार भंग केला. न्यायालयाचा अवमान केला. सार्वभौम सभागृहाचा आपमान केला आहे. म्हणून मी सामनाचे कार्यकारी संपादक संजय राऊत यांच्याविरोधात हक्कभंगाचा प्रस्ताव मांडतोय, असं जयकुमार गोरे यांनी विधानसभेत सांगितले.