Illegal Gambling – कोरेगाव भीमा (ता. शिरूर) येथील पोलीस चौकी शेजारीच दिवसाढवळ्या सुरू असलेल्या मटका अड्ड्यावर स्थानिक गुन्हे अन्वेषण विभागाने छापा टाकून मोठी कारवाई केली आहे. वढू रस्त्या लगत खुशबू पान शॉप समोर एका हॉटेलच्या शेडमध्ये कल्याण नावाचा मटका खेळला जात असल्याची माहिती मिळताच पोलिसांनी ही कारवाई केली. याप्रकरणी पोलिसांनी मटका चालक आणि जागा मालकासह १२ जणांविरुद्ध गुन्हा दाखल केला असून, एक लाख रुपयांचा मुद्देमाल जप्त केला आहे. मिळालेल्या माहितीनुसार, स्थानिक गुन्हे अन्वेषण विभागाचे पोलीस उपनिरीक्षक अभिजित सावंत आणि त्यांच्या पथकाने शिक्रापूर पोलिसांच्या मदतीने या ठिकाणी छापा टाकला. त्यावेळी काही इसम कागदावर आकडे लिहून मटका खेळताना आणि खेळवताना रंगेहात सापडले. पोलिसांनी घटनास्थळावरून मटक्याचे साहित्य आणि रोख रक्कम जप्त केली आहे. याप्रकरणी अरुण वानखेडे, दत्तात्रय कान्हूरकर, ज्ञानेश्वर थोरात, अविनाश शिवले, विराज आलम, कुंडलिक राठोड, सोमनाथ माने, वसंत सुपेकर, परमेश्वर शिंदे, श्रीमंत आबा पाटील, दत्ता वारघडे आणि जागा मालक राऊतमामा यांच्यावर शिक्रापूर पोलीस स्टेशनमध्ये गुन्हा नोंदवण्यात आला आहे. पोलीस हवालदार विकास सरोदे यांनी याप्रकरणी फिर्याद दिली असून, पुढील तपास पोलीस हवालदार नवनाथ नाईकडे करत आहेत. पोलीस चौकीच्या इतक्या जवळ हा अवैध व्यवसाय सुरू असल्याने परिसरात आश्चर्य व्यक्त केले जात आहे. चौकी शेजारीच मटका, अभय कोणाचे? कोरेगाव भीमा पोलीस चौकीपासून काही अंतरावरच दिवसाढवळ्या मटका अड्डा सुरू असताना स्थानिक पोलिसांना याची माहिती कशी मिळाली नाही, असा प्रश्न उपस्थित होत आहे. स्थानिक गुन्हे अन्वेषण विभागाला या ठिकाणी येऊन कारवाई करावी लागल्याने, या अड्ड्याला नेमके कोणाचे अभय होते? असा सवाल आता नागरिक विचारत आहेत.
