Raj Thackeray : मागील दोन दिवसांपासून महाराष्ट्र नवनिर्माण सेनेचे अध्यक्ष राज ठाकरे हे नाशिक दौऱ्यावर आहेत. त्यादरम्यान पॅरा धावपटू दिलीप गावित आणि त्यांचे प्रशिक्षक वैजनाथ काळे हे राज ठाकरेंच्या भेटीसाठी आले होते. मात्र, या दोघांना राज ठाकरे यांच्या भेटीसाठी तब्बल दोन ते अडीच तास ताटकळत बसावं लागलं, तरीही भेट न झाल्याने दोघांनीही तिथून निघून जाण्याचा निर्णय घेतला.

नाशिकच्या शासकीय विश्रामगृह येथे मनसे पदाधिकाऱ्यांसोबत बैठक पार पडली. यावेळी ही घटना घडली. या घटनेची राज्यभरात चर्चा होत असून सोशल मीडियावर व्हिडिओ व्हायरल झाल्यानंतर वेगवेगळ्या प्रतिक्रिया समोर येत आहेत. कॉमनवेल्थ गेम्स २०२६ या स्पर्धेत पॅराधावपटू दिलीप गावित याने देशासाठी सुवर्णपदकाची कामगिरी केली आहे.

ही स्पर्धा २३ जुलै ते २ ऑगस्ट दरम्यान ग्लासगो येथे पार पडली. त्याचे या यशाचे कौतुक राज्यभरातून करण्यात आले. अत्यंत कठीण परिस्थितीत दिलीप गावित याने खेळात यशस्वी कामगिरी करत आंतरराष्ट्रीय स्तरावर नावलौकिक केलं. राष्ट्रकुल क्रीडा स्पर्धेत पॅराअथलेट १०० मीटर शर्यतीत सुवर्णपदक जिंकलेला दिलीप गावित हा खेळाडू दिव्यांग आहे.

नेमकं काय घडलं?

राज ठाकरे नाशिक दौऱ्यावर आले असताना पॅरा धावपटू दिलीप गावित आणि त्यांचे प्रशिक्षक वैजनाथ काळे त्यांच्या भेटीसाठी आले होते. त्यांना काही वेळ थांबण्यास सांगण्यात आलं. मात्र, अडीच ते तीन तास झाल्यानंतरही भेट न झाल्याने दोघांनी निघून जाण्याचा निर्णय घेतला. यावेळी मनसेच्या पदाधिकाऱ्यांनी त्यांना रोखण्याचा आणि मनधरणी करण्याचा प्रयत्न केला.

मात्र, ‘जर भेटायचंच नव्हतं तर आम्हाला बोलावलं तरी कशाला?’ असा संतप्त सवाल प्रशिक्षक वैजनाथ काळे यांनी उपस्थित केला. हा संपूर्ण प्रकार तिथे उपस्थित लोकांच्या कॅमेऱ्यात कैद झाला. ज्याचे व्हिडीओ सध्या सोशल मीडियावर व्हायरल होत आहेत.

नेमकं काय म्हणाले वैजनाथ काळे? 

“जर भेटायचंच नव्हतं तर आम्हाला बोलावलं तरी कशाला? राज ठाकरे हे राज्याचे मोठे नेते आहेत मात्र आम्हीसुद्धा महाराष्ट्रासाठी आणि देशासाठी खूप मोठं योगदान दिलंय.” अशा शब्दांत त्यांनी आपला राग व्यक्त केला.

RTE Admission: आरटीई प्रवेशाला यंदा विक्रमी प्रतिसाद! तब्बल ९६ हजार ९९० विद्यार्थ्यांचे प्रवेश निश्चित