Sports Event 2026 list : क्रीडा प्रेमींसाठी २०२५ हे वर्ष जितके रोमांचक ठरले, त्यापेक्षाही मोठे आणि उत्कंठावर्धक वर्ष २०२६ असणार आहे. वर्षाच्या सुरुवातीलाच अंडर-१९ क्रिकेट वर्ल्ड कपचा थरार पाहायला मिळेल, तर त्यानंतर लगेचच पुरुष टी-२० वर्ल्ड कपचा बिगुल वाजणार आहे. इतकेच नाही, तर फुटबॉल चाहत्यांची प्रतीक्षा संपवून ११ जूनपासून फिफा वर्ल्ड कपलाही सुरुवात होणार आहे. २०२६ मध्ये कोणत्या मोठ्या स्पर्धा कधी आणि कुठे खेळल्या जाणार आहेत, याचा सविस्तर आढावा घेऊया: १. आयसीसी अंडर-१९ वर्ल्ड कप वर्षाच्या सुरुवातीलाच, १५ जानेवारी ते ६ फेब्रुवारी दरम्यान आयसीसी अंडर-१९ वर्ल्ड कपचे आयोजन करण्यात आले आहे. या स्पर्धेचे यजमानपद झिम्बाब्वे आणि नामीबिया यांच्याकडे संयुक्तपणे आहे. भारतासह ऑस्ट्रेलिया आणि इंग्लंडच्या युवा संघांकडे जेतेपदाचे प्रबळ दावेदार म्हणून पाहिले जात आहे. २. पुरुष टी-२० वर्ल्ड कप २०२६ क्रिकेट विश्वातील सर्वात मोठ्या स्पर्धांपैकी एक असलेला टी-२० वर्ल्ड कप ७ फेब्रुवारी ते ८ मार्च या काळात रंगणार आहे. भारत आणि श्रीलंका या स्पर्धेचे संयुक्त यजमान आहेत. या स्पर्धेतही २० संघ सहभागी होणार असून, १५ फेब्रुवारीला भारत आणि पाकिस्तान यांच्यातील हाय-व्होल्टेज सामना पाहायला मिळणार आहे. ३. आयपीएलचा १९ वा हंगाम आयपीएल (IPL) १९ व्या सीझनला २६ मार्चपासून सुरुवात होण्याची शक्यता आहे. यावेळच्या आयपीएलमध्ये मोठे बदल झाले आहेत. विशेष म्हणजे, राजस्थान रॉयल्सचा माजी कर्णधार संजू सॅमसन यंदा चेन्नई सुपर किंग्सच्या पिवळ्या जर्सीमध्ये खेळताना दिसणार असल्याने चाहत्यांमध्ये मोठी उत्सुकता आहे. ४. आयसीसी महिला टी-२० वर्ल्ड कप महिला क्रिकेटमध्येही यंदा वर्ल्ड कपचा थरार पाहायला मिळणार आहे. इंग्लंडमध्ये १२ जून ते ५ जुलै दरम्यान ही स्पर्धा खेळवली जाईल. भारत आणि पाकिस्तानच्या महिला संघांमधील महत्त्वाचा सामना १४ जून रोजी होणार आहे. ५. टीम इंडियाचा इंग्लंड दौरा भारतीय पुरुष संघ जुलै महिन्यात इंग्लंडच्या दौऱ्यावर जाणार आहे. आगामी २०२७ च्या वनडे वर्ल्ड कपच्या दृष्टीने हा दौरा अत्यंत महत्त्वाचा आहे. यामध्ये भारतीय संघ ५ टी-२० (१ ते ११ जुलै) आणि ३ वनडे सामन्यांची मालिका (१४ ते १९ जुलै) खेळणार आहे. ६. फिफा फुटबॉल वर्ल्ड कप (FIFA World Cup) २०२६ चे सर्वात मोठे आकर्षण म्हणजे फुटबॉल वर्ल्ड कप! अमेरिका, कॅनडा आणि मेक्सिको या तीन देशांमध्ये संयुक्तपणे ही स्पर्धा आयोजित केली जाणार आहे. ११ जूनपासून सुरु होणाऱ्या या महाकुंभाचा अंतिम सामना १९ जुलै रोजी अमेरिकेत खेळवला जाईल. ७. टेनिस: ऑस्ट्रेलियन ओपनपासून सुरुवात टेनिस चाहत्यांसाठी वर्षाची सुरुवात १२ जानेवारीला ऑस्ट्रेलियन ओपनने होईल. त्यानंतर मे महिन्याच्या शेवटी ‘फ्रेंच ओपन’, २९ जूनपासून मानाची ‘विम्बल्डन’ स्पर्धा आणि वर्षाच्या अखेरीस ‘यूएस ओपन’चा थरार रंगणार आहे. ८. कॉमनवेल्थ गेम्स (CWG) स्कॉटलंडमधील ग्लास्गो शहरात २०२६ चे कॉमनवेल्थ गेम्स आयोजित केले जाणार आहेत. २३ जुलै ते २ ऑगस्ट या कालावधीत ही स्पर्धा होणार असून भारतीय खेळाडूंवर पुन्हा एकदा पदकांची लूट करण्याची जबाबदारी असेल. ९. एशियन गेम्स (आशियाई खेळ) जपानमध्ये यंदा आशियाई खेळांचे आयोजन १९ सप्टेंबर ते ४ ऑक्टोबर या काळात करण्यात आले आहे. मागील काही स्पर्धांमधील भारताची चमकदार कामगिरी पाहता, यंदाही भारतीय खेळाडूंकडून विक्रमी कामगिरीची अपेक्षा आहे. १०. हॉकी वर्ल्ड कप हॉकीचा वर्ल्ड कप यंदा नेदरलँड्स आणि बेल्जियममध्ये खेळवला जाईल. १४ ते ३० ऑगस्ट या काळात होणाऱ्या या स्पर्धेत भारतीय हॉकी संघाने आपले स्थान आधीच निश्चित केले आहे.
