Cricket : इंद्रा नूई यांचा कार्यकाळ समाप्त…! आयसीसी नवीन महिला संचालकाच्या शोधात, जाणून घ्या कोण-कोण आहे ‘या’ शर्यतीत …
ICC To Get New Female Director : आंतरराष्ट्रीय क्रिकेट परिषदेने (ICC) नवीन महिला स्वतंत्र संचालकाचा शोध सुरू केला आहे, कारण इंद्रा नूई ( Indra Nooyi) यांचा सहा वर्षांचा कार्यकाळ गेल्या महिन्यात संपुष्टात आला आहे. अशी माहिती समोर येत आहे की, आयसीसी बोर्डाने आधीच कॉर्पोरेट जगतातील सर्वात लोकप्रिय चेहऱ्यांपैकी एक असलेल्या नुई यांच्यासारख्या हाय-प्रोफाइल नावाचा शोध सुरू केला आहे.
इंद्रा नूई यांनी आंतरराष्ट्रीय क्रिकेट परिषदेशी (ICC) संबंध तोडले आहेत. पेप्सिकोच्या माजी सीईओ, जे जागतिक संस्थेच्या पहिल्या स्वतंत्र महिला संचालक होत्या, यापुढे त्या प्रतिष्ठित पदावर असणार नाहीत. क्रिकबझच्या मते, त्यांचा कार्यकाळ गेल्या महिन्यात कोलंबो येथे झालेल्या वार्षिक परिषदेदरम्यानच संपुष्टात आला. भारतीय वंशाच्या अमेरिकन नूई यांनी कोलंबो परिषदेदरम्यान ऑनलाइन बैठकीत भाग घेतला आणि दिलेल्या संधीसाठी आयसीसीचे आभार मानले होते.
असे मानले जात आहे की, आयसीसी आता स्वतंत्र संचालकाच्या व्याख्येत बसू शकेल असा योग्य उमेदवार शोधत आहे. त्याची जागा ऑस्ट्रेलियन महिला घेणार असल्याची चर्चा आहे. चेन्नईत जन्मलेल्या अमेरिकन उद्योगपती नूई जून 2018 मध्ये सुरुवातीच्या दोन वर्षांच्या कालावधीसाठी आयसीसी मध्ये सामील झाल्या, आयसीसी घटनेनुसार, एक स्वतंत्र महिला संचालक प्रत्येकी दोन वर्षांच्या तीन टर्मसाठी पात्र आहे आणि त्याप्रमाणे जुलै 2024 मध्ये, इंद्रा नूई यांनी तीन टर्म असलेली सहा वर्षे पात्रतेप्रमाणे पूर्ण केली आहेत.
इंद्रा नूई यांची प्रथम आयसीसी मध्ये नियुक्ती शशांक मनोहर यांनी केली होती, जे आयसीसी चे माजी अध्यक्ष आणि भारतीय क्रिकेट नियामक मंडळाचे (BCCI) माजी अध्यक्ष आहेत. त्यानंतर त्यांना दोन वेळा सेवेत मुदतवाढ मिळाली. आयसीसी मध्ये सामील होण्यापूर्वी, नुई यांनी 2006 ते 2018 पर्यंत पेप्सिकोचे सीईओ म्हणून काम केले आहे.
महिला संचालकांच्या जाण्यानंतर, आयसीसीच्या शक्तिशाली मंडळात आता 12 पूर्ण सदस्य, तीन सहयोगी राष्ट्र संचालक आणि अध्यक्षांसह 16 सदस्य आहेत. मात्र, आता मंडळात 17 सदस्य असतील. ही संख्या महत्त्वाची आहे कारण संचालक नवीन अध्यक्षांची निवड करतील, ज्यासाठी आयसीसीने मंगळवारी अधिसूचना जारी केली.
आयसीसीचे नियम काय सांगतात?
आयसीसीच्या नियमांनुसार, संचालक मंडळ अशा व्यक्तीची निवड करेल जी एक महिला असणे आवश्यक आहे आणि तीने संचालक पात्रता निकष पूर्ण केल्या पाहिजेत. ज्यामुळे क्रिकेटच्या खेळामध्ये समानता, विविधता आणि समावेशाच्या हिताचे वेळोवेळी योग्य प्रतिनिधित्व केले जाईल.
नियुक्तीसाठी नेमके काय निकष आहेत याबद्दल विचारले असता, आयसीसी बोर्डाच्या जवळच्या एका सूत्राने सांगितले की, ती कोणतीही प्रतिष्ठित महिला असू शकते, मग ती कॉर्पोरेट जगतातील किंवा क्रीडा क्षेत्रातील असू शकते. ते म्हणाले की, “ती कोणीही असू शकते ज्याने खेळ, व्यवसाय किंवा सर्वसाधारणपणे योगदान दिले आहे” उदाहरणार्थ, ती मेग लॅनिंग, शार्लोट एडवर्ड्स किंवा व्यावसायिक समुदायातील प्रभावशाली महिला असू शकते.’ नामनिर्देशन समितीने दिलेल्या किमान तीन शिफारशींच्या यादीतून दोन वर्षांच्या कालावधीसाठी संचालक मंडळाकडून प्रथम स्वतंत्र संचालकाची निवड केली जाईल आणि ती व्यक्ती अध्यक्षपदाच्या निवडणुकीदरम्यान मतदान करण्यासही पात्र असेल.
