UAE Batter Asif Khan Banned For 15 Months By ICC For Anti Doping Rule Violation : आंतरराष्ट्रीय क्रिकेट परिषदने (ICC) संयुक्त अरब अमिरातीचा (UAE) प्रमुख फलंदाज आसिफ खानवर (Asif Khan) डोपिंग नियमांचे उल्लंघन केल्याप्रकरणी १५ महिन्यांची बंदी घातली आहे. स्पर्धेतर घेण्यात आलेल्या डोप चाचणीत आसिफ प्रतिबंधित एनाबॉलिक स्टिरॉइडसाठी पॉझिटिव्ह आढळला होता. त्याच्या शरीरात ‘मेस्टेरोलोन’चे (Mesterolone) अंश सापडले होते, ज्याचा वापर शरीरातील टेस्टोस्टेरॉनची पातळी वाढवण्यासाठी केला जातो. या कारवाईमुळे आंतरराष्ट्रीय क्रिकेट जगतात मोठी खळबळ उडाली आहे.

आसिफने मान्य केली चूक; ७ डिसेंबर २०२६ पर्यंत मैदानाबाहेर –

३६ वर्षीय आसिफ खानने आयसीसी डोपिंग विरोधी संहितेच्या कलम २.१ (Rule 2.1) चे उल्लंघन केल्याची कबुली दिली आहे. जागतिक डोपिंग विरोधी संस्था (WADA) आणि आयसीसीसोबत झालेल्या समझोत्यानुसार त्याने ही शिक्षा स्वीकारली. ही बंदी ८ सप्टेंबर २०२५ पासून लागू मानली गेली असून, ती ७ डिसेंबर २०२६ पर्यंत कायम राहील. आसिफला ८ ऑक्टोबर २०२६ पासून सरावाची परवानगी मिळेल; मात्र अधिकृत स्पर्धात्मक क्रिकेटमध्ये तो ८ डिसेंबर २०२६ नंतरच पुनरागमन करू शकेल.

८ सप्टेंबर ते २९ डिसेंबर २०२५ दरम्यानचे सर्व रेकॉर्ड रद्द –

Asif Khan sanctioned for anti-doping violation! 🚨

UAE batter Asif Khan has accepted a 15-month period of ineligibility after testing positive for a banned substance, a metabolite of mesterolone, in an out-of-competition test conducted on September 8, 2025.#AsifKhan #UAE #ICC pic.twitter.com/IlL3UWXrMV

— OneCricket (@OneCricketApp) August 27, 2026

आयसीसीच्या कडक नियमांनुसार, चाचणीची तारीख असलेल्या ८ सप्टेंबर २०२५ ते त्याच्या तात्पुरत्या निलंबनाची सुरुवात (२९ डिसेंबर २०२५) या कालावधीत आसिफने नोंदवलेले सर्व वैयक्तिक विक्रम आणि निकाल रद्दबातल (Disqualified) ठरवण्यात आले आहेत. २०२२ मध्ये आंतरराष्ट्रीय पदार्पण करणाऱ्या आसिफने यूएईसाठी ३८ एकदिवसीय सामन्यांत ३ शतके आणि ७ अर्धशतकांसह ३८.४८ च्या सरासरीने १,२७० धावा केल्या आहेत. तसेच ५६ टी-२० सामन्यांत १३८ च्या स्ट्राईक रेटने १,३०२ धावा त्याच्या नावावर आहेत.

हेही वाचा – Shubman Gill Reaction : “आम्ही २५० षटकं मैदानात घाम गाळला, पण…”; कोलंबो कसोटी अनिर्णित राहिल्यानंतर कर्णधार गिलची प्रतिक्रिया

पाकिस्तान सोडून यूएईत स्थायिक; आशिया कपमध्ये खेळला होता अखेरचा सामना –

पाकिस्तानमध्ये जन्मलेल्या आसिफ खानने २०१७ मध्ये यूएईमध्ये स्थलांतर केले होते. त्यापूर्वी त्याने पाकिस्तानच्या देशांतर्गत क्रिकेटमध्ये ३२ प्रथम श्रेणी सामने खेळले होते. यूएईच्या राष्ट्रीय संघात दाखल झाल्यानंतर त्याने अनेक धडाकेबाज खेळी केल्या होत्या. गेल्या वर्षी झालेल्या आशिया चषक स्पर्धेत तो आपला अखेरचा आंतरराष्ट्रीय सामना खेळला होता. मात्र, आता डोपिंगच्या विळख्यात अडकल्यामुळे त्याच्या आंतरराष्ट्रीय क्रिकेट कारकिर्दीला मोठा सुरुंग लागला आहे.