ICC Format Changes : आयसीसीचा मोठा निर्णय! बदलले वनडे आणि टी-२० वर्ल्ड कपचे नियम; ‘सुपर ७’ आणि ‘सुपर १०’ मुळे थरार वाढणार
ICC Format Changes : क्रिकेटमधील चुरस वाढवणे, स्पर्धात्मक स्तर उंचावणे आणि चाहत्यांना एक नवा थरारक अनुभव देणे हा यामागील मुख्य उद्देश असल्याचे आयसीसीने स्पष्ट केले आहे.
ICC Changes ODI T20 World Cup Format Super 7 Super 10 Rules 2026 : आयसीसीने क्रिकेट जगतात मोठे फेरबदल करत पुरुष वनडे आणि टी-२० विश्वचषक स्पर्धांच्या स्वरूपात क्रांतिकारक बदलांची घोषणा केली आहे. एडिनबर्ग येथे आयोजित आयसीसीच्या वार्षिक परिषदेत मुख्य कार्यकारी समितीच्या (CEC) शिफारशींनंतर या ऐतिहासिक निर्णयांवर अंतिम मुहर उमटवण्यात आली. क्रिकेटमधील चुरस वाढवणे, स्पर्धात्मक स्तर उंचावणे आणि चाहत्यांना एक नवा थरारक अनुभव देणे हा यामागील मुख्य उद्देश असल्याचे आयसीसीने स्पष्ट केले आहे.
वनडे विश्वचषकात आता ‘सुपर ७’ चा नवा थरार!
१४ संघांचा समावेश असलेल्या वनडे विश्वचषकात आता तीन टप्प्यांचे (Stages) नवे स्वरूप पाहायला मिळेल. सर्वात कमी क्रमवारी असलेले तीन संघ (क्रमांक १२, १३ आणि १४) सुरुवातीला पहिल्या टप्प्यात म्हणजेच ‘सुपर सिरीज’मध्ये परस्परांविरुद्ध खेळतील. यातून केवळ एकच सर्वोत्तम संघ मुख्य टप्प्यात प्रवेश करेल.
दुसऱ्या टप्प्यात एकूण १२ संघ असतील, ज्यांची ६-६ च्या दोन गटांत विभागणी केली जाईल. या दोन्ही गटांतील प्रत्येकी अव्वल तीन संघ आणि दोन्ही गटांतील पुढील एक सर्वोत्तम संघ मिळवून एकूण ७ संघ ‘सुपर ७’ या अत्यंत महत्त्वाच्या साखळी (Round-Robin) टप्प्यात प्रवेश करतील. या ‘सुपर ७’ मधून अव्वल चार संघ थेट उपांत्य फेरीत (Semifinal) धडक मारतील. यामुळे प्रत्येक सामन्याचे महत्त्व वाढणार असून उदयोन्मुख संघांनाही मोठी संधी मिळेल.
टी-२० विश्वचषकात ‘सुपर १०’ आणि ‘एलिमिनेटर’ची एन्ट्री!
The ICC has announced an exciting revamped format for the Men’s @cricketworldcup 2027 edition in South Africa, Zimbabwe and Namibia 🏆
More details ➡️ https://t.co/VxWr3PFpIX pic.twitter.com/RU1VnCbE9B
— ICC (@ICC) July 15, 2026
२० संघांच्या टी-२० विश्वचषकात आता पहिल्या टप्प्यात ४-४ संघांचे ५ गट असतील (एकूण २० सामने). प्रत्येक गटातील अव्वल दोन संघ ‘सुपर १०’ टप्प्यासाठी पात्र ठरतील, जिथे ५-५ संघांचे दोन गट असतील. नॉकआऊट फेरीच्या नियमात मोठा बदल करत, दोन्ही गटांतील फक्त अव्वल (नंबर १) संघ थेट उपांत्य फेरीत पोहोचेल. तर दोन्ही गटांतील दुसऱ्या आणि तिसऱ्या क्रमांकावर राहणारे संघ उर्वरित दोन उपांत्य फेरीच्या जागांसाठी एकमेकांविरुद्ध ‘क्रॉस-ओव्हर एलिमिनेटर’ (Eliminator) सामना खेळतील.
२०२८ टी-२० विश्वचषकाचा पात्रता मार्ग जाहीर –
आयसीसीने २०२८ च्या टी-२० विश्वचषकासाठी स्कॉटलंडला युरोप प्रादेशिक फायनलमध्ये थेट प्रवेश दिला आहे. २०२६ च्या स्पर्धेत बांगलादेशच्या ऐवजी ऐनवेळी आलेल्या स्कॉटलंडच्या विशेष परिस्थितीचा विचार करून हा निर्णय घेण्यात आला. उर्वरित संघांना जागतिक आणि प्रादेशिक पात्रता फेऱ्या पार करून २०२८ च्या विश्वचषकाचे तिकीट मिळवावे लागेल. या संपूर्ण आराखड्याला आयसीसी बोर्डाने मंजुरी दिली असून, नोव्हेंबरमधील बैठकीत आर्थिक बाबींच्या पुनरावलोकनानंतर यावर अंतिम शिक्कामोर्तब होईल.
