मुंबई : लाचखोर IAS अधिकारी अनिल रामोड यांचा निलंबनाचा कालावधी संपल्यानंतर शासनाने त्यांना पुन्हा एकदा नियुक्ती दिली आहे. अनिल रामोड यांना 9 जून 2023 रोजी 8 लाख रुपयांची लाच घेताना रंगेहात पकडण्यात आले होते. शेतकऱ्यांच्या जमिनी महामार्ग विकासासाठी घेतल्या जात आहेत, त्यांना जास्त मोबदला देण्याच्या बदल्यात 8 लाख रुपयांची लाच घेताना रामोड यांना पकडण्यात आले होते. त्यानंतर, त्यांच्यावर निलंबनाची कारवाई करण्यात आली होती. मात्र आता त्यांची पुन्हा नियुक्ती करण्यात आली आहे. कुठे करण्यात आली नियुक्ती? मराठवाडा वैधानिक विकास मंडळाच्या सदस्य सचिव म्हणून अनिल रामोड यांची नियुक्ती करण्यात आली आहे. कुणाल कुमार, भाप्रसे हे अध्ययन रजेवर गेल्यामुळे रिक्त असलेल्या जागी ते पद वरिष्ठ समय श्रेणीत अवनत करून आपली नियुक्ती करण्यात आली आहे. तरी आपण नवीन पदाचा कार्यभार त्वरीत स्वीकारावा, असे पत्रच डॉ. अनिल रामोड यांना अपर मुख्य सचिव (सेवा) यांच्या सहीने प्राप्त झाले आहे. आणखी दोन अधिकाऱ्यांची केली बदली सतिश कुमार खडके यांनाही शासनाने संचालक (आपत्ती व्यवस्थापन), महसूल व वन विभाग, मंत्रालय, मुंबई या पदावर लहू माळी, भाप्रसे यांच्या जागी नियुक्ती दिली आहे. तसेच अजीज शेख यांची शासनाने व्यवस्थापकीय संचालक, शिवशाही पुनर्वसन प्रकल्प, मुंबई या रिक्त पदावर बदली केली आहे. तरी, आपण नवीन पदाचा कार्यभार त्वरीत स्वीकारावा, असे आदेश अपर मुख्य सचिवांनी दिले आहेत.
