Tempest Advertising: टेम्पेस्ट ॲडव्हर्टायझिंग (Tempest Advertising) संस्थेने यंदाच्या ‘आयएए ऑलिव्ह क्राउन पुरस्कार 2026’मध्ये प्रभावी कामगिरी करत एक सुवर्ण व एक रौप्य पुरस्कार पटकावला आहे. पर्यावरणीय शाश्वततेच्या संदर्भात कृत्रिम बुद्धिमत्ता (एआय) या विषयावर आधारित आशयघन जाहिरातींसाठी संस्थेचा गौरव करण्यात आला. ‘प्रेस अनरिलीज्ड’ या विभागात टेम्पेस्टने हे दोन्ही पुरस्कार मिळवले. शाश्वततेकडे केवळ भावनिक दृष्टिकोनातून न पाहता, त्यामागील प्रणाली व संसाधनांचा वापर कसा होतो, याकडे लक्ष वेधण्याचा प्रयत्न या मोहिमांमधून करण्यात आला आहे. सुवर्ण विजेत्या ‘एआय द वॉटर डेमन’ या मोहिमेत कृत्रिम बुद्धिमत्तेच्या वापराचा लपलेला पर्यावरणीय खर्च उघड करण्यात आला आहे. एआय प्रणाली कार्यान्वित ठेवण्यासाठी डेटा केंद्रांमध्ये मोठ्या प्रमाणावर पाण्याचा वापर होतो आणि त्यातील मोठा हिस्सा वाफ होऊन नष्ट होतो, हा विरोधाभास प्रभावीपणे मांडण्यात आला आहे. या प्रक्रियेला ‘अदृश्य शोषण’ असे संबोधत, वापरकर्त्यांच्या डिजिटल कृती आणि त्याचे पर्यावरणीय परिणाम यामधील दरी स्पष्ट करण्यात आली आहे. याबाबत बोलताना वरिष्ठ उपाध्यक्ष व बेंगळुरू शाखा प्रमुख अभिषेक जाना यांनी सांगितले की, “समस्या केवळ अति वापराची नसून, डिजिटल कृतींचा पर्यावरणावर होणारा परिणाम लोकांना माहीत नसणे ही अधिक गंभीर बाब आहे. याबाबत जनजागृती करणे गरजेचे आहे.” या मोहिमेसाठी प्रतिलिपी लेखन येसू मुथू, कला दिग्दर्शन लक्ष्मीकांत अमीनगड, सर्जनशील दिग्दर्शन राघवेंद्र भट, प्रकल्प व्यवस्थापन जुबैर खान आणि धोरण आखणी अभिषेक जाना यांनी केली. दरम्यान, रौप्य विजेत्या ‘सुरमई’ या मोहिमेत इंडो-पॅसिफिक किंग मॅकरेल या माशाच्या झपाट्याने होत असलेल्या नामशेषतेकडे लक्ष वेधण्यात आले आहे. ‘सुर मर गई’ या शब्दखेळातून तयार केलेल्या या संकल्पनेत प्रथम माशाचा आकार दिसतो; अर्थ लक्षात आल्यानंतर तो अदृश्य होतो. ज्यामुळे प्रेक्षकांवर ठसठशीत प्रभाव पडतो. या मोहिमेची कल्पना वरिष्ठ प्रतिलिपी लेखक दीपक सोनवणे यांनी मांडली असून, सर्जनशील दिग्दर्शन संजय कांबळे, रचना प्रशांत अंबलगीकर आणि नेतृत्व संजय शिंदगीकर यांनी सांभाळले. या यशाबद्दल बोलताना पुणे शाखा प्रमुख संजय शिंदगीकर म्हणाले, “या पुरस्कारामुळे आमच्या टीमला मोठी प्रेरणा मिळाली आहे. शेवटच्या क्षणी सुचलेली कल्पना प्रभावी मोहिमेत रूपांतरित करण्यात टीमने उत्कृष्ट कामगिरी केली.” तुराब लकडावाला यांनी स्थापन केलेली टेम्पेस्ट जाहिरात संस्था गेली २७ वर्षे या क्षेत्रात कार्यरत असून, अर्थपूर्ण व परिणामकारक संकल्पनांद्वारे ब्रँड घडविण्यावर तिचा भर आहे. पुणे, हैदराबाद, बेंगळुरू आणि मुंबई येथे संस्थेच्या शाखा कार्यरत आहेत.
