जामखेड : पुण्यभूमी असलेल्या चोंडी विकास आराखड्यासाठी ६०० कोटींचा निधी माझ्या काळात मंजूर करण्याचा निर्णय आपल्याच मुख्यमंत्रीपदाच्या काळात झाला. जामखेडला सभा होऊ नये म्हणून अनेकांचा प्रयत्न झाला. मात्र मी एक शिवसेनेचा कार्यकर्ता असून शिवसैनिकांच्या मागे भक्कमपणे उभा आहे. आता नगर विकास खाते आपल्याकडेच असून जामखेड शहराच्या सर्वांगीण विकासासाठी निधी कमी पडू देणार नाही. मात्र, त्यासाठी आपल्या शिवसेनेच्या उमेदवार पायल बाफना यांना निवडणून द्या. ३ डिसेंबरला मी स्वतः विजयाच्या जल्लोषात सहभागी होईल, अशी ग्वाही शिवसेनेचे मुख्य नेते व राज्याचे उपमुख्यमंत्री एकनाथ शिंदे यांनी दिली. जामखेड येथील नगरपरिषद निवडणुकीसाठी शिवसेनेच्या उमेदवाराच्या प्रचारार्थ उपमुख्यमंत्री शिंदे यांची प्रचार सभा झाली. या सभेत ते बोलत होते. यावेळी नगराध्यक्षापदाचे उमेदवार पायल बाफना शिवसेना नेत्या ज्योती वाघमारे, जिल्हा प्रमुख बाबूशेठ टायरवाले, शिवसेना तालुका प्रमुख कैलास माने यांच्यासह प्रमुख शिवसैनिक, उमेदवार, नागरिक मोठ्या संख्येने उपस्थित होते. उपमुख्यमंत्री शिंदे म्हणाले, जामखेड शहरात प्रचंड धूळ, खराब रस्ते, दूषित पाणी यांसह अनेक समस्या आहेत. नगर विकास विभागाच्या माध्यमातून शहराच्या सर्वांगीण उभारणीसाठी सातत्याने मदत मिळेल, याची त्यांनी हमी दिली. ही निवडणूक कार्यकर्त्यांची असून कार्यकर्त्याला निवडून द्यायला पाहिजे, असे ते म्हणाले. सत्ता येते आणि जाते पण नाव गेलं तर परत येत नाही. सगळ्या पदांपेक्षा लाडक्या बहिणींचा लाडका भाऊ ही ओळख सगळ्यात मोठी आहे, असे उपमुख्यमंत्री म्हणाले. सत्ता, संपत्तीपेक्षा माणसं किती कमवली हे आपल्यासाठी महत्वाचे आहे, “मी मुख्यमंत्री असो वा उपमुख्यमंत्री, माझी ओळख कार्यकर्ता हीच आहे,” सत्ता येते-जाते, परंतु बाळासाहेब ठाकरे यांनी दिलेली शिकवण जपणे हेच आपले ध्येय असल्याचे एकनाथ शिंदे यांनी स्पष्ट केले. दिलेला शब्द पाळतो म्हणून लोकांचा विश्वास आहे. बाळासाहेबांनी शिवसैनिकांना ८० टक्के समाजकारण आणि २० टक्के राजकारण अशी शिकवण दिली. मात्र इथं जे १०० टक्के राजकारण करत आहेत त्यांचा येत्या निवडणुकीत त्यांचा १०० टक्के पराभव करायचाय, विकासापासून वंचित ठेवणाऱ्यांना नगर परिषदेच्या निवडणुकीत मतदानापासून वंचित ठेवा आणि विकासाची गंगा जोरात येण्यासाठी शिवसेनेला विजयी करा. शिवसेनेचा धनुष्यबाण हा शेतकऱ्यांचा, लाडक्या बहिणींचा, लाडक्या भावांचा आहे. हा धनुष्यबाण विकासाचा आहे. त्यामुळे शिवसेनेचे पूर्ण पॅनल निवडून आणायचे, असे आवाहन उपमुख्यमंत्री शिंदे यांनी केले. उपमुख्यमंत्र्यांच्या सभेमुळे जामखेड मध्ये निवडणूक वातावरण आणखी उत्साही झाल्याचे दिसून आले.
