Amit Shah – आपल्या देशात राजकारण्यांच्या निवृत्तीबद्दल नेहमीच चर्चा होते. तथापि, देशाच्या राजकारणात निवृत्तीसाठी कोणतीही कालमर्यादा नाही. संविधानानुसार, व्यक्ती कोणत्याही वयापर्यंत निवडणूक लढवू शकते. मात्र केंद्रीय गृहमंत्री अमित शहा यांनी त्यांची निवृत्तीनंतरची योजना सांगितली आहे. भविष्यात ते काय करणार याची माहिती त्यांनी दिली.

ते म्हणाले की, मी निवृत्त झाल्यावर माझे उर्वरित आयुष्य नैसर्गिक शेतीसाठी समर्पित करण्याचे ठरवले आहे. निवृत्तीनंतर मी माझे आयुष्य वेद, उपनिषद वाचण्यासाठी आणि नैसर्गिक शेतीसाठी घालवीन. ही नैसर्गिक शेती हा एक प्रकारचा वैज्ञानिक प्रयोग आहे जो अनेक प्रकारचे फायदे देतो असे अहमदाबाद येथील कार्यक्रमात बोलताना शहा यांनी सांगितले.

अमित शहा म्हणाले की रासायनिक खतयुक्त गहू खाल्ल्याने कर्करोग होतो. रक्तदाब वाढतो, थायरॉईडची समस्या होते. खाणाऱ्या व्यक्तीचे शरीर निरोगी ठेवण्यासाठी शुद्ध अन्न खाणे आवश्यक आहे, जर असे झाले तर याचा अर्थ औषधांची गरज भासणार नाही. यामुळे उत्पादन देखील वाढते. मी माझ्या शेतात नैसर्गिक शेतीचा अवलंब केला आहे, आज माझे धान्य उत्पादन जवळजवळ दीड पट वाढले आहे.

अमित शहा सध्या राजकीय जीवनात सक्रिय आहेत, परंतु ते अजूनही नैसर्गिक शेती करतात. चांगले आरोग्य राखण्यासाठी दोन तास शारीरिक व्यायाम आणि सहा तास झोपेचा नियम अंगीकारण्याचे आवाहन शहा यांनी तरुणांना केले. ते म्हणाले की, देशाच्या प्रगतीत योगदान देण्यासाठी तरुणांकडे अजूनही ४०-५० वर्षे आहेत.