पुणे : पुण्यातील मुळशी तालुक्यातील वैष्णवी हगवणे मृत्यू प्रकरणाने राज्यात खळबळ उडाली आहे. या प्रकरणात रोज नवनवीन खुलासे होत असून वैष्णवीच्या आई वडिलांकडून सासरच्या लोकांवर गंभीर आरोप केले आहेत. या प्रकरणात पोलिस वैष्णवीचे सासरे आणि दीर यांचा शोध घेत आहेत.

वैष्णवीचे सासरे राजेंद्र हगवणे हे राष्ट्रवादी काँग्रेस पक्षाचे तालुकाध्यक्ष असल्याचे समोर आले आहे. यावर प्रदेशाध्यक्ष सुनील तटकरे यांनी हगवणे कुटुंबाचा पक्षाशी काहीही संबंध नसल्याचे म्हटले आहे.

याच्याशी माझा दुरान्वये संबंध नाही :  अजित पवार

त्यानंतर आता राज्याचे उपमुख्यमंत्री आणि पुण्याचे पालकमंत्री अजित पवार यांनी या प्रकरणावर पहिली प्रतिक्रिया दिली आहे. वैष्णवी हगवणे प्रकरणाशी माझा दुरान्वये संबंध नाही, असं अजित पवार यांनी म्हटले आहे.

उपमुख्यमंत्री अजित पवार यांनी वैष्णवी हगवणे प्रकरणावर सहाव्या दिवशी पहिली प्रतिक्रिया दिली. अजित पवार आज बारामतीच्या दौऱ्यावर असून बारामती विमानतळ येथे दाखल होताच त्यांनी या प्रकरणाशी माझा दुरान्वये संबंध नाही अशी प्रतिक्रिया दिली आहे.

वैष्णवी ही राष्ट्रवादी काँग्रेस अजित पवार गटाचे नेते राजेंद्र हगवणे यांची सून होती. या प्रकरणी वैष्णवीच्या कुटुंबीयांनी अनेक गंभीर आरोप केले आहेत. हगवणे कुटुंबाला अजित पवार यांच्याकडून पाठिंबा मिळत असल्याचा दावा कस्पटे कुटुंबीयांनी केला आहे. त्यानंतर या प्रकरणावर अजित पवार यांनी पहिली प्रतिक्रिया दिली आहे.

राष्ट्रवादीशी कोणताही संबंध नाही : सुनील तटकरे

मुळशीच्या हगवणे कुटुंबाचा राष्ट्रवादीशी सध्या कोणताही संबंध नाही. राजेंद्र हगवणे हे राष्ट्रवादी काँग्रेस पक्षाच्या कोणत्याही पदावर नियुक्त नव्हते, असे सुनील तटकरे म्हणाले आहेत.

तीन आरोपींना न्यायालयीन पोलिस कोठडी

दरम्यान, या प्रकरणात वैष्णवीचा सासरच्या लोकांनी छळ केला असल्याचा आरोप देखील होत आहे. या प्रकरणी पोलिसांनी तीन आरोपींना अटक केली असून वैष्णवीचा सासरा आणि दीर फरार आहेत. त्यांच्या शोधासाठी पोलिसांचे चार पथक तैनात करण्यात आली आहेत. पोलिसांनी अटक केलेल्या तीन आरोपींना न्यायालयाने पोलिस कोठडी सुनावली आहे.