Rajpal Yadav : बॉलिवूड अभिनेता राजपाल यादवच्या अडचणी पुन्हा एकदा वाढल्या आहेत. चेक बाऊन्स प्रकरणाशी संबंधित सुनावणीदरम्यान राजपाल यादवने काही रक्कम फेडण्याची तयारी दर्शवली आहे. या सुनावणीत न्यायालयानेही महत्त्वाची टिप्पणी केली.

सुनावणीदरम्यान राजपाल यादवने आपल्या आर्थिक अडचणींचा उल्लेख करत ‘अता पता लापता’ या चित्रपटामुळे मोठे आर्थिक नुकसान झाल्याचे सांगितले. चित्रपटाच्या निर्मितीमुळे आपले तब्बल १७ कोटी रुपयांचे नुकसान झाल्याचा दावा त्याने न्यायालयासमोर केला.

राजपाल यादवने सांगितले की, गेल्या १३ वर्षांपासून संबंधित वादामुळे चित्रपटाचे काम रखडले होते. संबंधित पक्षाने स्थगिती आदेश मिळवल्यामुळे चित्रपट पूर्ण करता आला नाही आणि त्यामुळे आपले मोठे नुकसान झाले, असा दावा त्याने केला.

आपली व्यथा मांडताना राजपाल यादवने म्हटले की, “मी अनेक वर्षांपासून लोकांचे मनोरंजन करत आहे. मात्र आता मी स्वतःच एका ड्रामाचा भाग बनलो आहे.” हे सांगताना त्याने आतापर्यंत सुमारे २०० चित्रपटांमध्ये काम केल्याचा उल्लेखही केला.

नेमकं काय आहे प्रकरण?

हे प्रकरण मुरली प्रोजेक्ट्स प्रायव्हेट लिमिटेडशी संबंधित चेक बाऊन्स प्रकरणांशी निगडित आहे. या प्रकरणात दिल्ली उच्च न्यायालयाने राजपाल यादवला दोषी ठरवत प्रत्येक प्रकरणात तीन महिन्यांच्या तुरुंगवासाची शिक्षा सुनावली होती.

यानंतर हे प्रकरण सर्वोच्च न्यायालयात पोहोचले. मागील सुनावणीदरम्यान न्यायालयाने राजपाल यादवने वारंवार आदेश देऊनही संबंधित रक्कम जमा न केल्याबद्दल नाराजी व्यक्त केली होती.

सरन्यायाधीश न्यायमूर्ती सूर्यकांत यांनी सुनावणीदरम्यान तक्रारदाराला काही रक्कम परत मिळावी, या उद्देशाने राजपाल यादवला संधी दिली जात असल्याचे स्पष्ट केले. अन्यथा शिक्षेविरोधातील त्याचे अपील फेटाळले असते, असेही न्यायालयाने नमूद केले.

सर्वोच्च न्यायालयाने राजपाल यादवला दोन कोटी रुपये जमा करण्यासाठी एक दिवसाची मुदत दिली होती. ही त्याच्यासाठी शेवटची संधी असल्याचेही न्यायालयाने स्पष्ट केले होते. आता राजपाल यादवने काही कर्ज फेडण्याची तयारी दर्शवल्याने या प्रकरणातील पुढील घडामोडींकडे सर्वांचे लक्ष लागले आहे.

Election Commission: “कोणत्याही राजकीय पक्षाला भेटायला आक्षेप नाही,” ; राहुल गांधींच्या आरोपांवर आयोगाकडून स्पष्टीकरण