Amol Palekar : राज्यात हिंदी मराठी भाषेवरून वाद सुरू आहे. राज्य सरकाराने पहिलीपासून त्रिभाषा सूत्र लागू करण्याचा निर्णय घेतला होता. यामुळे पहिलीपासून हिंदी भाषेची सक्ती करण्यात येणार होती. मात्र, राज्य सरकारच्या या निर्णयाला आव्हान देत ठाकरे बंधू मैदानात उतरले आणि सरकारला हिंदी भाषेचा निर्णय रद्द करावा लागला. तरीही महाराष्ट्रातील नुकत्याच घडलेल्या घटनांवरून मराठी का हिंदी असा वाद सुरूच आहे.

अनेक मराठी सिलेब्रेटींनी याविषयी आपली प्रतिक्रिया दिली आहे. आता या भाषावादावर ज्येष्ठ अभिनेते आणि दिग्दर्शक अमोल पालेकर यांनी आपले मत व्यक्त केले आहे. एका हिंदी दैनिकाच्या कार्यक्रमात त्यांनी महाराष्ट्रात सुरू असलेल्या भाषिक वादावर भाष्य केले. आम्ही मराठी आहोत आणि मराठी हीच आमची भाषा आणि ओळख आहे, असे ते म्हणाले.

तसेच हिंदी लादण्याच्या सरकारच्या प्रयत्नांच्या विरोधात त्यांनी आपली स्पष्ट भूमिका मांडली. त्यांचा याविषयीचा व्हिडीओ महाराष्ट्र नवनिर्माण सेनेच्या अधिकृत एक्स अकाऊंटवरून शेअर करण्यात आला आहे.

ज्येष्ठ अभिनेते श्री. अमोल पालेकर यांनी हिंदी दैनिक जागरणाच्या संवाद कार्यक्रमात जिथे प्रामुख्याने संवाद हिंदीत होता तिकडे, हिंदी लादण्याच्या सरकारच्या प्रयत्नांच्या विरोधात स्पष्ट भूमिका मांडली. ते म्हणाले हिंदी ही ओळख आम्हाला मान्य नाही, आम्ही मराठी आहोत आणि मराठी हीच आमची भाषा… pic.twitter.com/xMj98nQr6K

— MNS Adhikrut – मनसे अधिकृत (@mnsadhikrut) July 25, 2025

काय म्हणाले अमोल पालेकर? 

मला एक गोष्ट सांगायची आहे, हा कार्यक्रम हिंदी दैनिक जागरणचा आहे, त्यामुळे आपण हिंदी आहोत त्या संदर्भाने वाचतो. पण याच्या मागे काही राजनैतिक भूमिका असल्यास, तर त्याच्याशी मी सहमत नाही. मराठी हूँ मेरी मातृभाषा मराठी है, आम्ही दोघंही अस्संल मराठी आहोत. मात्र, महाराष्ट्रात इयत्ता पहिलीच्या वर्गापासून हिंदी भाषा लादली जात आहे, मी आणि संध्या याचा विरोध करतो, अशी त्यांनी महाराष्ट्रात सुरू असलेल्या भाषा मुद्यांवर आपली भूमिका मांडली.