Raj Thackeray : नवी मुंबईतील मनसे वाहतूक सेनेच्या मेळाव्यात राज ठाकरे यांनी वाहतुकीच्या मुद्यांवरुन भाष्य केले. वाहतूकदारांना शिस्त यावी याकरता कठोर कायद्यांची गरज असल्याचं त्यांनी कायम अधोरेखित केलं आहे. हा महाराष्ट्र माझ्या हातात, सत्ता कधी देताय याची मी खरंच वाट पाहतोय, शिस्त आणणं हे काही रॉकेट सायन्स नाहीये याला फक्त इच्छा लागते, असे मनसे अध्यक्ष राज ठाकरे यांनी म्हटलं आहे.

यावेळी त्यांनी फुटपाथवर चालता येत नाही, आमच्याकडे बागा नाहीत, आमच्याकडे चांगली मैदान नाहीत, आणि सांगायचं 7.8 टक्के जीडीपी झालाय, अशी टीकाही त्यांनी सरकारवर केली.

राज ठाकरे म्हणाले की, देशातील ट्रॅफिक बघितल्यानंतर या देशातल भविष्य दिसतं, या देशाचा वर्तमान पण दिसतो. कारण आम्हाला माहितीच नाही, गाड्या चालवायच्या कशा, गाड्या पार्क कुठे करायच्या हे आम्हाला आणि सरकारलाही माहित नाही. आपल्याकडे फक्त पूल बांधले जातात, रस्ते अशासाठी बांधले जातात की परत दोन वर्षात काम निघावीत.

दुचाकी चालवणाऱ्याना वाटतं  सिग्नल आपल्यासाठी नाहीच
पुढे त्यांनी सांगितले की, अनेकदा टेम्पो सगळ्या उजव्या बाजूने चाललेले असतात. रस्त्याच्या खरतर पूर्णपणे डाव्या बाजूने चाललं पाहिजे हा कायदा आहे. रस्त्याच्या कॉर्नरला गाड्या पार्क करू नयेत हा कायदा आहे, पण कोण पाळत नाही.

माणसाचं काम कमी व्हावं म्हणून ट्रॅफिक सिग्नल आले, आमच्याकडे ट्रॅफिक सिग्नल पण असतो आणि पुढे हवालदार पण उभा असतो. दुचाकी चालवणाऱ्याना तर असं वाटतं, सिग्नल आपल्यासाठी नाहीच, त्या चार चाकी गाड्यांसाठी आहे.

राज ठाकरे यांनी सांगितलं की, नो पार्किंगचा फुटपाथ हा तुम्ही काळ्या आणि लाल पट्ट्यांमध्ये करा म्हणजे लोकांना समजेल की इथे पार्किंग करायचं नाही आणि जिकडे पार्किंग करायचं तिथे पिवळ्या आणि काळ्या पट्ट्यांमध्ये तो फुटपाथ रंगवला तर लोकांना सोपं जात बघायला.माझं पोलीस संरक्षण असून देखील मी माझ्या सर्व चालकांना माझी सख्त ताकीद असते सिग्नल मोडायचा नाही कितीही अर्जंट असेल काम तरी सिग्नल मोडायचा नाही.

“माणसांचं काम कमी व्हावं, म्हणून यंत्र आलीत. आपल्याकडे ट्राफिक सिग्नल आले, जेणेकरून माणसांचं काम होईल. पण आपल्याकडे ट्राफिक सिग्नलही असतो आणि पुढे हवालदारही असतो, इतकी आपल्याकडे खात्री असते.  मी मध्यंतरी याच बाबतीतील प्रपोजल मुख्यमंत्री, उपमुख्यमंत्री आणि मुंबई महानगरपालिकेच्या आयुक्तांना सांगितलं. पुढे काही झालं नाही. मी त्यांना सांगितलं होतं की जे नो पार्किंगचे फुटपाथ आहेत, तिथे काळ्या आणि लाल रंगाच्या पट्ट्याने रंगवा. जिथे पार्किंग करायचे आहे, तिथे पिवळ्या आणि काळ्या रंगांनी रंगवा. मी दोन चार वेळा सांगितल्यानंतर दादरमधील एका फुटपाथचे रंग लाल करून टाकले. पण लोकांना कोण सांगणार?”, असंही राज ठाकरे म्हणाले.

डेव्हलोपमेंट होते, पण टाऊन प्लानिंग होत नाही

“जिथे आपण गाड्या चालवत आहोत, साधारणपणे एखाद्या क्षेत्रफळाच्या १५ टक्के रस्ते असले पाहिजे, असा कायदा आहे. जिथं ५० माणसं राहत होती, तिथे ५०० माणसं आली, त्यांच्या गाड्या आल्या. पण त्या पार्क कुठे करणार? आपल्याकडे डेव्हलोपमेंट होते, पण टाऊन प्लानिंग होत नाही. त्यामुळे सर्व बोजवारा उडतो. याचं पुढे काय होणार आहे, याची काहीही कल्पना नसते. नागरिक म्हणून आपण जबाबदारी स्वीकारली तर, गोष्टी आपोआप होतील.”

मला कधी कधी वाटतं की पुण्यासारख्या शहरात एक दिवस सगळे उठतील, गाड्या घेतील आणि तिथेच बसतील. गाडी पुढेच जाणार नाही. बदाबदा गाड्यांचं रजिस्ट्रेशन होत आहे. आज नवी मुंबईसारख्या ठिकाणी रेल्वेतून लाखो प्रवासी प्रवास करत आहेत, रेल्वे कोलमडली आणि गाड्यांमध्ये आले तर कुठून बाहेर पडाल घरातून? शहरांना काही आकारच उरला नाहीय. फुटपाथवर चालता येत नाही. मैदाने नाहीत, बागा नाहीत. कुठेही टॉवर, कॉलन्या उभ्या राहत आहेत. तिकडे टँकरने पाणी जातंय, याला शिस्त म्हणतात का?”, असा सवालही राज ठाकरेंनी केला.

हेही वाचा: 

Rahul Gandhi : न्यायालयात जाताना राहुल गांधींच्या ताफ्यात अपघात ; अनेक कार्यकर्ते जखमी