Rahul Gandhi : लोकसभेतील विरोधी पक्षनेते आणि काँग्रेस खासदार राहुल गांधी यांच्या ताफ्याचा उत्तर प्रदेशात अपघात झाला. आज सकाळी लखनौ विमानतळावरून सुलतानपूरकडे जात असताना त्यांच्या ताफ्यातील वाहनांची टक्कर झाली.

मिळालेल्या माहितीनुसार, या अपघातात पक्षाचे कार्यकर्ते जखमी झाले असून, पाच वाहने आणि एका रुग्णवाहिकेचे नुकसान झाले आहे. हा अपघात लखनौमधील पूर्वांचल द्रुतगती मार्गावर झाला, जो हालियापूर पोलीस ठाण्याच्या हद्दीत येतो. राहुल गांधी सध्या सुरक्षित आहेत, परंतु अपघाताचे कारण अद्याप स्पष्ट झालेले नाही.

राहुल गांधी आज सुलतानपूर न्यायालयात हजर होणार Rahul Gandhi :
उत्तर प्रदेशातील सुलतानपूर न्यायालयात राहुल गांधी यांच्या विरोधात २०१८ पासून एक मानहानीचा खटला प्रलंबित आहे. एका स्थानिक भाजप नेत्याने दाखल केलेल्या तक्रारीनुसार, त्यांच्यावर भाजपचे माजी अध्यक्ष आणि सध्याचे केंद्रीय गृहमंत्री अमित शाह यांच्याबद्दल अपमानजनक टिप्पणी केल्याचा आरोप आहे.

या खटल्याचा निकाल आज अपेक्षित असून, राहुल गांधी खासदार-आमदार न्यायालयात हजर होणार आहेत. दरम्यान, लखनौ विमानतळावरून सुलतानपूर न्यायालयाकडे जात असताना पूर्वांचल एक्सप्रेसमध्ये त्यांच्या ताफ्याचा अपघात झाला, ज्याचा तपास पोलिसांनी सुरू केला आहे.

दरम्यान, खासदार-आमदार न्यायालयाचे दंडाधिकारी शुभम वर्मा यांनी दोन्ही बाजूंचे युक्तिवाद ऐकल्यानंतर आपला निर्णय राखून ठेवला आहे. हे प्रकरण २०१८ सालचे असून, बंगळूरमधील एका कार्यक्रमात केंद्रीय गृहमंत्री अमित शाह यांच्याबद्दल अपमानजनक टिप्पणी केल्याचा आरोप राहुल गांधींवर आहे.

भाजपचे माजी जिल्हा उपाध्यक्ष विजय मिश्रा यांनी आक्षेप घेत राहुल गांधींविरुद्ध गुन्हा दाखल केला होता. सुलतानपूर जिल्ह्यातील कोतवाली देहात भागातील हनुमानगंजचे रहिवासी असलेल्या विजय मिश्रा यांनी सुलतानपूर न्यायालयात राहुल गांधींविरुद्ध मानहानीची याचिका दाखल केली असून, त्यावरचा निर्णय प्रलंबित आहे.

राहुल गांधी फेब्रुवारी २०२४ पासून जामिनावर  Rahul Gandhi :
राहुल गांधी यांना १६ डिसेंबर २०२३ रोजी न्यायालयाने समन्स बजावले होते. ते त्या दिवशी न्यायालयात हजर झाले आणि फेब्रुवारी २०२४ मध्ये सुलतानपूर विशेष न्यायालयाने त्यांना जामीन मंजूर केला. राहुल गांधी यांनी मानहानीचे आरोप नाकारले आणि स्वतःला निर्दोष घोषित केले.

साक्ष आणि पुराव्यांची कार्यवाही पूर्ण झाल्यानंतर, खटल्यातील अंतिम युक्तिवाद झाला आणि निकाल राखून ठेवण्यात आला. विजय मिश्रा यांनी या प्रकरणात राहुल गांधींच्या आवाजाच्या नमुन्याची तपासणी करण्याची मागणीही केली होती.

मात्र, सत्र न्यायालयाने ही याचिका फेटाळली. आवाजाच्या नमुन्याच्या तपासणीची मागणी करणारी याचिका फेटाळण्याच्या निर्णयाला आव्हान देणारी अपीले सत्र न्यायालयाने आणि नंतर अलाहाबाद उच्च न्यायालयानेही फेटाळून लावली.