Human Trafficking – परदेशात लाखो रुपयांच्या पगाराची नोकरी देण्याचे आमिष दाखवत नागपूरच्या २८ वर्षीय विवाहितेची पोर्तुगालमध्ये मानवी तस्करी करून विक्री करण्यात आली. या प्रकरणी विमानतळ पोलिसांनी पुण्यातील एजंटांसह परदेशातील आठजणांविरुद्ध फसवणूक, मानवी शोषण, गुन्हेगारी कट आणि धमकीसह विविध गंभीर कलमांखाली गुन्हा दाखल केला आहे.

फिर्यादी महिलेने डिसेंबर २०२५ मध्ये इन्स्टाग्रामवर वुई मायग्रेट कंपनीची जाहिरात पाहिली होती. पोर्तुगाल, स्पेन, नेदरलँड्ससह विविध देशांमध्ये उच्च पगाराची नोकरी मिळवून देण्याचे आश्वासन देत विमाननगर येथील कार्यालयात बोलावले. व्हिडीओ कॉलद्वारे परदेशात काम करणाऱ्या व्यक्तींशी संवाद घडवून तिचा विश्वास संपादन केला.

त्यानंतर व्हिसा, वर्क परमिट, विमान तिकीट, विमा आणि इतर खर्चाच्या नावाखाली तिच्याकडून टप्प्याटप्प्याने तब्बल आठ लाख उकळण्यात आले. मे २०२६ मध्ये तिला स्पेनमार्गे पोर्तुगालला पाठविण्यात आले. तेथे पोहोचल्यानंतर तिचा पासपोर्ट काढून घेण्यात आला आणि दोन दिवस एका खोलीत डांबून ठेवण्यात आले. पासपोर्ट परत देण्यासाठी ४० हजार रुपयांची मागणी करण्यात आली.

भीतीपोटी तिने स्वतःजवळील ४०० युरो देऊन पासपोर्ट परत मिळवला. त्यानंतर तिला एका दुकानात साफसफाईच्या कामावर ठेवले. याबाबत भारतातील एजंटांकडे तक्रार केली असता, वर्क परमिट मिळेपर्यंत असेच काम करावे लागेल, असे सांगून तिची दिशाभूल करण्यात आली. काही दिवसांनी दुकानमालकाने तिला आपल्या घरी कामासाठी नेले. त्याचवेळी एजंटांनी मालकाला सर्व प्रकारे खूश ठेवावे लागेल, असे सांगितले.

त्यानंतर मालकानेच आपण तिला एजंटांकडून विकत घेतल्याचे सांगत वेश्याव्यवसायासाठी दबाव टाकल्याचा धक्कादायक आरोप फिर्यादीने केला आहे. प्रसंगाचे गांभीर्य लक्षात येताच महिलेने पतीशी संपर्क साधला. २९ जून २०२६ रोजी पहाटे आरोपींच्या तावडीतून शिताफीने सुटका करून घेत तिने दुसरे शहर गाठले. तेथून विमानाने दोहा मार्गे दिल्ली आणि नंतर नागपूर गाठत तिने जीव वाचवला.