न्यूयॉर्क – करोनाने गेले वर्षभर जगाला बेजार केले. सगळ्यांना कोंडून ठेवले. करोना कधी जाणार, जाणार की नाही असे प्रश्‍न सगळ्यांच्या मनात होते. अखेर लस दाखल झाली. ती उपयुक्त ठरत असल्याचा दावा आणि प्रमाणही आहे. मात्र तोवर करोनाने नवा अवतार धारण केला. आता या नव्या विषाणूवर लस चालणार का, असेही प्रश्‍न आहेत. या पार्श्‍वभूमीवर करोना नेमका जाणार कधी असे प्रश्‍न पुन्हा सतावू लागले आहेत.

आंतरराष्ट्रीय वृत्तसंस्था ब्लूमबर्गच्या मते जगात आतापर्यंत 11.90 कोटी लोकांना लस देण्यात आली आहे. या एजन्सीने जगभरात दिलेल्या लसींचा सर्वात मोठा डेटाबेस तयार केला आहे. या डेटाबेसच्या आधारे, त्यांनी साथीच्या समाप्तीचे मूल्यांकन केले आहे.

जेव्हा एखाद्या व्यक्तीला लस दिली जाते तेव्हा काही आठवड्यांत त्याच्यामध्ये करोना विषाणूशी लढण्याचे सामर्थ्य बनते. परंतु जर समाजातील केवळ थोड्या लोकांना ही लस मिळाली असेल तर व्हायरसचा संसर्ग सुरूच राहू शकतो.

जितके लोक लसीकरण करतात तितक्‍याच लोकांमध्ये विषाणूविरूद्ध प्रतिकारशक्ती निर्माण होते. एकत्र लसीकरण झाले तर त्यामुळे सगळ्यांची प्रतिकारशक्ती वाढेल. सध्या रोज लसीकरण होणाऱ्या लोकांची संख्या तुलनेने कमी आहे. त्यामुळे करोनाचा धोका कायम आहे.

प्रसिद्ध अमेरिकन इम्यूनोलॉजिस्ट डॉ. एंथनी फौसी यांच्या मते, जगातील जवळपास 70 ते 85 टक्के लोक लसीकरण करतात, तेव्हा जगातील प्रत्येक व्यक्तीला करोना विषाणूपासून प्रतिकार शक्ती मिळेल. तरच आपण पुन्हा सामान्य जीवनात जाऊ शकू.

सध्या जगात दररोज सरासरी 45,40,345 लस दिल्या जात आहेत. या दराने, जगातील 75 टक्के लोकांना लसीकरण करण्यासाठी अंदाजे सात वर्षे जातील. काही देश लसीकरणाच्या उद्दीष्ट्याकडे वेगाने पुढे जात आहेत.

सर्वाधिक लसीकरण दरासह इस्रायल हा देश दोनच महिन्यात 75 टक्के लोकसंख्येस लस देण्याच्या उद्दीष्टाच्या जवळ आहे. अमेरिकेत हे चित्र नवीन वर्षापर्यंत पाहिले जाऊ शकते. श्रीमंत देशांमध्ये लसीकरण दर जास्त आहेत, परंतु उर्वरित जगाला ही लस सगळ्यांना देईपर्यंत सुमारे सात वर्षे लागतील.