इंदापूर : इंदापूर तालुक्यातील रेडा गावात भरदिवसा घडलेल्या एका धक्कादायक घरफोडीच्या घटनेने परिसरात भीतीचे वातावरण पसरले आहे. अलका कृष्णा मोहिते या विवाहित महिलेचे बंद घर फोडून चोरट्यांनी घरावरील पत्रे, लोखंडी अँगल आणि गृहपयोगी साहित्य चोरून नेले. या प्रकरणी बावडा पोलीस दूरक्षेत्रांतर्गत इंदापूर पोलीस ठाण्यात चार जणांविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, अलका मोहिते ६ जुलै रोजी पंढरपूरला गेल्या होत्या. याचा फायदा घेत चोरट्यांनी त्यांच्या राहत्या घराचे दरवाजे फोडले आणि घरातील ९ हजार ६०० रुपये किमतीचे साहित्य चोरले. यामध्ये लाकडी चौकट, लोखंडी कॉट, १० ताटे, १० तांबे, ४ हांडे, ३ बादल्या, १० ग्लास, ३ पातेली आणि एक कुकर यांचा समावेश आहे. याशिवाय, घरावरील पत्रे आणि लोखंडी अँगलही काढून नेल्याचे उघड झाले आहे.

फिर्यादी अलका मोहिते यांचा पुतण्या पांडुरंग मोहिते आणि शेजाऱ्यांनी चोरी करताना शेखर मधुकर कांबळे, त्याची पत्नी मनीषा शेखर कांबळे, त्यांचा मुलगा आणि एक अनोळखी व्यक्ती यांना पाहिले. चोरट्यांनी चोरीचे साहित्य चारचाकी वाहनात भरून पलायन केले. विशेष म्हणजे, मुख्य आरोपी शेखर मधुकर कांबळे याच्यावर यापूर्वी एका शिक्षिकेच्या खुनाच्या प्रकरणातही गुन्हा दाखल होता, ज्यामुळे गावकऱ्यांमध्ये अधिकच दहशत निर्माण झाली आहे.

इंदापूर पोलीस ठाण्याचे वरिष्ठ पोलीस निरीक्षक सूर्यकांत कोकणे यांच्या मार्गदर्शनाखाली बावडा पोलीस दूरक्षेत्राचे भारत जाधव आणि त्यांचे सहकारी या प्रकरणाचा तपास करत आहेत. पोलिसांनी घटनास्थळी भेट देऊन पंचनामा केला आहे. मात्र, अद्याप आरोपींना अटक करण्यात आलेली नाही.

गावात भीतीचे वातावरण

भरदिवसा घडलेल्या या धाडसी घरफोडीमुळे रेडा गावात तणावाचे वातावरण आहे. गावकऱ्यांनी चोरट्यांविरुद्ध कठोर कारवाईची मागणी केली आहे. पोलिसांचा तपास सुरू असून, लवकरच आरोपींना ताब्यात घेण्याचे प्रयत्न सुरू आहेत.