फलटण – फलटण येथील एका हॉटेल व्यावसायिकास हनीट्रॅपमध्ये अडकवून त्यांच्याकडून 4 लाख रुपयांची खंडणी उकळण्याचा प्रयत्न करणार्या महिलेसह सात जणांच्या टोळीला फलटण ग्रामीण पोलिसांनी जेरबंद केले आहे. उमेश संजय खोमणे (वय 28, रा. खराडेवाडी, ता. फलटण), गणेश बाळू मदने (वय 19, रा. पाचसर्कल, खामगाव, ता. फलटण), कुमार उर्फ बोक्या लक्ष्मण शिंदे (वय 28, रा. भाडळी खुर्द, ता. फलटण), जयराज उर्फ स्वागत आनंदराव चव्हाण (वय 26, रा. झिरपवाडी, ता. फलटण), आकाश काशिनाथ डांगे (वय 30, रा. भाडळी बु, ता. फलटण), माया (टोपण नाव, वय 30) व अनिल गजरे (पूर्ण नाव व पत्ता माहित नाही) अशी याप्रकरणी अटक केलेल्यांची नावे आहेत. याबाबत पोलिसांनी दिलेली अधिक माहिती अशी, फलटण येथील हॉटेल व्यावसायिक सजल विलास दोशी (वय 37) यांनी याबाबत तक्रार दिली आहे. त्यांच्या हॉटेल चॉईस पॉईंटमध्ये गेल्या चार महिन्यापासून एक महिला अधून मधून जेवणाचे पार्सल नेण्यासाठी येत होती. त्यामुळे या महिलेचा मोबाईल क्रमांक त्यांच्याकडे होता. तिच्याशी ओळख झाल्यानंतर दि. 30 ऑगस्ट रोजी माया नावाची ही महिला त्यांच्या समवेत फिरायला जाण्यासाठी तयार झाली. सुरवडी या ठिकाणावरून त्यांच्या मोटरसायकलवर दोघांनी लोणंद, वीरधरण या ठिकाणी फेरफटका मारल्यानंतर सुरक्षित लॉज शोधत होते. परंतु त्यांना सुरक्षित लॉज न मिळाल्याने ते परत येत असताना त्यांना काळज-बडेखानजवळ दोन व्यक्तींना अडवले. आमच्या बहिणीला घेऊन कुठे घेऊन फिरता असे म्हणून त्यांना मारहाण केली. त्यांना गाडीवरून रस्त्याच्या बाजूला घेऊन गेले. त्यावेळी संबंधित महिला तेथून निघून गेली. यानंतर या दोन व्यक्ती सजल दोशी यांना रात्री 11 वाजेपर्यंत मारहाण करुन त्यांच्यावर बलात्काराची केस करणार असल्याची धमकी देत होते. अनोळखींनी दोशी यांच्याकडून फोन फे वरुन जबरदस्तीने 26 हजार रुपये घेतले आणि उद्या 4 लाख रुपये घेवून ये अन्यथा त्यांचे नग्न केलेले फोटो व बलात्कार केल्याबाबत वदवून घेतलेला व्हिडिओ व्हायलर करण्याची धमकी दिली होती. तक्रार दाखल झाल्यानंतर पोलिसांनी संबंधित महिलेचा शोध घेत तिला ताब्यात घेतले त्यावेळी या कटात सराईत गुन्हेगार सहभागी असल्याचे समोर आले. त्यांच्याकडे चौकशी केल्यानंतर महिलेसह सात जणांना पोलिसांनी अटक केली. या कारवाईत पोलीस अधीक्षक समीर शेख, अपर पोलीस अधीक्षक वैशाली कडुकर व पोलीस उपअधीक्षक राहुल धस यांच्या मार्गदर्शनाखाली पोलीस निरीक्षक सुनील महाडीक, गुन्हे प्रकटीकरण विभागाचे सहाय्यक पोलीस निरीक्षक विशाल वायकर, शिवाजी जायपत्रे, पोलीस उपनिरीक्षक गोपाल बदने, मच्छिंद्र पाटील, पोलीस अमंलदार नितीन चतुरे, वैभव सूर्यवंशी, श्रीनाथ कदम, संदीप मदने, अमोल जगदाळे, श्रीकांत खरात, हनुमंत दडस, रशिदा पठाण यांनी सहभाग घेतला. पुढील तपास पोलीस उपनिरीक्षक गोपाल बदने हे करीत आहेत.
