Homebound Movie : ९८ व्या ऑस्कर पुरस्कारांसाठीची नामांकन यादी २२ जानेवारी रोजी जाहीर झाली. यंदाच्या ऑस्कर शर्यतीत भारतातून आंतरराष्ट्रीय फिचर फिल्म विभागात ‘होमबाऊंड’ हा चित्रपट शॉर्टलिस्ट झाला होता. त्यामुळे या चित्रपटाकडून नामांकनाची अपेक्षा व्यक्त केली जात होती. मात्र अखेर ‘होमबाऊंड’ला Homebound Movie ऑस्कर नामांकन मिळालं नाही आणि तो स्पर्धेतून बाहेर पडला.

धर्मा प्रॉडक्शनची निर्मिती असलेल्या आणि नीरज घायवान दिग्दर्शित या चित्रपटाबाबत ही बातमी समोर येताच निर्माता करण जोहरने सोशल मीडियावर भावना व्यक्त केल्या.

करण जोहरने इंस्टाग्राम स्टोरीवर चित्रपटातील काही दृश्यं शेअर करत लिहिलं, “हा चित्रपट ऑस्करपर्यंत पोहोचला, याचाच मला प्रचंड अभिमान आहे. नीरज, तुला मनापासून प्रेम. तुझ्या प्रकाशात आम्हालाही चमकता आलं, यासाठी धन्यवाद.” #Homebound असा हॅशटॅगही त्याने वापरला.

View this post on Instagram

A post shared by Dharma Productions (@dharmamovies)

संवेदनशील आणि शांतपणे भिडणारी कथा

‘होमबाऊंड’ Homebound Movie हा भावनाप्रधान, शांत आणि अंतर्मुख करणारा चित्रपट आहे. नीरज घायवान यांचा ‘मसान’प्रमाणेच हा चित्रपट मानवी नातेसंबंध, आठवणी, घराची ओढ आणि विस्थापनाच्या भावनांवर भाष्य करतो.

चित्रपटाची कथा दोन मित्रांभोवती फिरते जे आपापल्या संघर्षांसह, भूतकाळाच्या आठवणी घेऊन वर्तमानात जगत आहेत. गावातील आठवणी, शहरातील वास्तव, लहानपण आणि आजचा संघर्ष या सगळ्या गोष्टी अतिशय तरलपणे मांडण्यात आल्या आहेत. संवाद कमी, पण मौनातून व्यक्त होणारा अभिनय हीच या चित्रपटाची खरी ताकद ठरते. चित्रपटात इशान खट्टर आणि जान्हवी कपूर प्रमुख भूमिकेत दिसतात.

होमबाऊंड' निघाला ऑस्करला; बेस्ट इंटरनॅशनल फीचर फिल्म कॅटेगरीसाठी शॉर्टलिस्ट | Saamana (सामना)

फेस्टिव्हल्समध्ये कौतुक, पण ऑस्कर नामांकन हुकलं

‘होमबाऊंड’ला विविध आंतरराष्ट्रीय फिल्म फेस्टिव्हल्समध्ये चांगला प्रतिसाद मिळाला. कथा, सिनेमॅटोग्राफी आणि मानवी संवेदनशीलता या बाबी विशेषत्वाने प्रशंसिल्या गेल्या. त्यामुळे ऑस्कर नामांकनाची आशा अधिक बळावली होती. मात्र जागतिक पातळीवरील स्पर्धेत हा चित्रपट अंतिम यादीत स्थान मिळवू शकला नाही.

हा चित्रपट देशभरात मोठ्या प्रमाणावर प्रदर्शित झाला नव्हता. निवडक चित्रपटगृहं आणि फिल्म फेस्टिव्हल्सपुरताच त्याचा प्रवास मर्यादित राहिला. तरीही प्रेक्षकांनी चित्रपटाला पसंती दिली आणि बॉक्स ऑफिसवरही समाधानकारक कमाई केली.

सध्या ‘होमबाऊंड’ नेटफ्लिक्सवर उपलब्ध आहे. ऑस्कर नामांकन मिळालं नसलं, तरीही हा चित्रपट त्याच्या आशय, संवेदनशील मांडणी आणि प्रामाणिक प्रयत्नांसाठी लक्षात राहणारा ठरतो.

हेही वाचा :

Homebound Movie : होमबाउंड चित्रपट ऑस्करच्या शर्यतीतून बाहेर