ओझर: अष्टविनायकांतील मुख्य स्थान असलेल्या श्री क्षेत्र ओझर येथे विघ्नहर मंदिरासमोर होळीचा सण उत्सहात साजरा करण्यात आला. श्री विघ्नहर गणपती देवस्थान ट्रस्टचे अध्यक्ष बाळासाहेब कवडे, विश्वस्त समीर मांडे, महिला विश्वस्त शिल्पा जगदाळे, माजी अध्यक्ष मुरलीधर घेगडे, व्यवस्थापक, अशोक घेगडे, ग्रामस्थ सुदाम मांडे, भास्कर रोकडे व भाविक गणेशभक्त यांच्या उपस्थितीत पुजापाठ करून मंत्रोच्चारात होळी साजरी करण्यात आली.

अध्यक्ष बाळासाहेब कवडे यांच्या शुभहस्ते होळी पेटविण्यात आली. यावेळी उपस्थित पदाधिकारी, ग्रामस्थ व गणेशभक्तांनी होळीला अभिवादन केले. देवस्थानच्या महिला विश्वस्त शिल्पा जगदाळे, ग्रामपंचायत सदस्या सुमन प्रकाश मांडे व रोकडे यांनी होळीला पुरण पोळीचा नैवद्य अर्पण केला. होळीसाठी आवश्यक असणारे साहित्य श्री विघ्नहर गणपती देवस्थान ट्रस्ट व ग्रामस्थ यांनी आणले होते. शेकडो भाविकांनी नारळरूपी समिधा होळीला अर्पण केल्या. सर्व कार्यक्रमाचे नियोजन देवस्थान ट्रस्टचे अध्यक्ष, उपाध्यक्ष, सचिव, खजिनदार, विश्वस्त व कर्मचारी वर्गाने केले होते.