Kunickaa Sadanand – ‘बिग बॉस 19’च्या घरात आपल्या बेधडक स्वभावाने आणि स्पष्टवक्तेपणाने चर्चेत आलेल्या अभिनेत्री कुनिका सदानंद यांच्या वैयक्तिक आयुष्याचीही जोरदार चर्चा झाली. विशेषतः प्रसिद्ध गायक कुमार सानू यांच्यासोबतच्या त्यांच्या जुन्या नात्याचा खुलासा झाल्यानंतर मनोरंजनविश्वात खळबळ उडाली.

कुनिका यांच्या म्हणण्यानुसार, कुमार सानू विवाहित असताना दोघे जवळ आले आणि त्यांचं हे नातं तब्बल सहा वर्षे टिकले. हे नातं त्यांनी सानू यांच्या कुटुंबीयांचा आणि मुलांचा विचार करून बराच काळ गुप्त ठेवल्याचंही त्यांनी सांगितलं आहे.

कुनिका यांनी सांगितलेल्या माहितीनुसार, कुमार सानू आणि त्यांची पहिली पत्नी रीटा भट्टाचार्य यांच्यात त्या काळात वैवाहिक दुरावा होता. याच काळात कुनिका आणि सानू यांच्यात जवळीक वाढली. मात्र, हे नातं समोर आल्यानंतर परिस्थिती अधिकच गुंतागुंतीची झाली.

‘हॉकी स्टिक’ने कारची तोडफोड केल्याचा कुनिका यांचा दावा

या नात्याबाबत बोलताना कुनिका यांनी त्यांच्या आयुष्यातील एका धक्कादायक प्रसंगाचा उल्लेख केला होता. त्यांच्या म्हणण्यानुसार, कुमार सानू यांच्या तत्कालीन पत्नी रीटा भट्टाचार्य यांना या नात्याची माहिती मिळाल्यानंतर त्यांनी कुनिका यांच्या कारची हॉकी स्टिकने तोडफोड केली होती. रीटा त्यांच्या घराबाहेर येऊन आरडाओरड करत असल्याचाही दावा कुनिका यांनी केला होता.

‘मी त्यांना माझा नवरा मानत होते’

कुनिका यांनी या नात्याबद्दल बोलताना ते केवळ मैत्री किंवा प्रेमसंबंध नव्हते, तर त्या काळात आपण कुमार सानू यांना पतीप्रमाणेच मानत असल्याचं सांगितलं होतं. दोघांनी आपलं नातं सार्वजनिक न करण्याचा निर्णय घेतला होता.

कार्यक्रमांमध्ये एकत्र दिसत असलो तरी कुटुंबीयांचा आणि मुलांचा विचार करून नातं खासगी ठेवल्याचं त्यांनी सांगितलं. मात्र, कालांतराने कुमार सानू आपल्याशी प्रामाणिक नसल्याचं लक्षात आल्यानंतर आपण हे नातं संपवलं, असा दावा कुनिका यांनी केला.

‘बिग बॉस 19’मध्ये पुन्हा जुन्या आयुष्याची चर्चा

‘बिग बॉस 19’मध्ये प्रवेश केल्यानंतर कुनिका यांच्या जुन्या आयुष्यातील अनेक गोष्टी पुन्हा चर्चेत आल्या. घरातील सहकलाकारांशी संवाद साधताना त्यांनी कुमार सानू यांच्यासोबतच्या जुन्या नात्याबद्दलही खुलासा केला. तब्बल 27 वर्षे हे गुपित मनात ठेवले आणि आता त्याबद्दल बोलल्यानंतर मन हलकं झाल्याचं त्यांनी सांगितलं होतं.

कुनिका सदानंद यांचं आयुष्य म्हणजे प्रेम, लग्न, संघर्ष, प्रसिद्धी आणि भावनिक चढ-उतारांनी भरलेला प्रवास. त्यामुळे ‘बिग बॉस 19’मध्ये त्यांची एंट्री झाल्यानंतर त्यांच्या पडद्यावरील कारकिर्दीइतकीच त्यांच्या खासगी आयुष्याची कहाणीही प्रेक्षकांच्या चर्चेचा विषय ठरली.