पिंपरी – हिंजवडी राजीव गांधी माहिती तंत्रज्ञान उद्यानातील (आयटी पार्क) वाहतूक कोंडीवर कायमस्वरूपी तोडगा काढण्यासाठी पुणे महानगर प्रदेश विकास प्राधिकरणाने (पीएमआरडीए) तब्बल २ हजार १८२ कोटी ७९ लाख रुपयांचा सर्वसमावेशक विकास आराखडा तयार केला आहे.

हिंजवडी, माण आणि मारुंजी परिसरातील प्रमुख रस्त्यांची क्षमता वाढविण्यासह सहा जोडरस्त्यांची उभारणी आणि मेट्रो स्थानकांपासून आयटी कंपन्यांपर्यंत ‘लास्ट माइल कनेक्टिव्हिटी’ विकसित करण्यावर या आराखड्यात भर देण्यात आला आहे.

उपमुख्यमंत्री सुनेत्रा अजित पवार यांच्या अध्यक्षतेखाली झालेल्या आढावा बैठकीत ‘पीएमआरडीए’च्या वतीने या आराखड्याचे सादरीकरण करण्यात आले. भुजबळ चौक, भूमकर चौक, लक्ष्मी चौक, विप्रो सर्कल, राधा चौक यांसह हिंजवडी, माण आणि मारुंजी परिसरातील प्रमुख मार्गांवरील वाहतुकीचा ताण कमी करणे, हा प्रकल्पाचा प्रमुख उद्देश आहे.

सहा जोडरस्त्यांवर १,७५६ कोटींचा खर्च
भुजबळ आणि भूमकर चौकावरील वाहतुकीचे विभाजन करण्यासाठी ‘पीएमआरडीए’ने सहा महत्त्वाच्या जोडरस्त्यांचे नियोजन केले आहे. या रस्त्यांची एकूण लांबी १७.७४ किलोमीटर आहे. यासाठी भूसंपादनावर १ हजार २६४ कोटी ५३ लाख रुपये, तर बांधकामासाठी ४४२ कोटी २६ लाख रुपये खर्च अपेक्षित आहे. या सहा रस्त्यांसाठी एकूण १ हजार ७५६ कोटी ७९ लाख रुपये खर्च होणार आहेत. प्रकल्प व्यवस्थापन सल्लागार नियुक्त करण्यासाठी निविदा प्रक्रिया सुरू आहे.

प्रस्‍तावित रस्‍ते
सूर्या हॉस्पिटल ते साखरे वस्ती (फेज-१) या १.३९ किलोमीटर लांबीच्या, १५ मीटर रुंदीच्या रस्त्यासाठी ११६.६६ कोटी रुपये खर्च अपेक्षित आहे. सूर्या हॉस्पिटल ते ठाकर वस्ती या ३.७४ किलोमीटर लांबीच्या आणि २४ मीटर रुंदीच्या रस्त्यासाठी ३८५.४३ कोटी रुपये खर्च प्रस्तावित आहे.

ठाकर वस्ती ते माण गावठाण या ३.४८ किलोमीटर लांबीच्या रस्त्यासाठी १४४.०२ कोटी रुपये, नांदे ते माण या १.८२ किलोमीटर लांबीच्या आणि ३६ मीटर रुंदीच्या रस्त्यासाठी ३६०.३७ कोटी रुपये खर्च अपेक्षित आहे.

शनि मंदिर, वाकड ते मारुंजी या ३.५१ किलोमीटर लांबीच्या आणि १८ मीटर रुंदीच्या रस्त्यासाठी २४७.७६ कोटी रुपये, तर मेझा-९ हॉटेल ते लक्ष्मी चौक–मारुंजी–कोलते पाटील गेट या चार किलोमीटर लांबीच्या आणि ३६ मीटर रुंदीच्या रस्त्यासाठी ४५२.५५ कोटी रुपये खर्च होणार आहेत.

मेट्रो स्थानकांपासून आयटी कंपन्यांपर्यंत थेट जोडणी
मेट्रो मार्गालगतचा परिसर विकसित करण्याबरोबरच मेट्रो स्थानकांपासून आयटी कंपन्यांपर्यंतचा प्रवास सुलभ करण्यासाठी २७.६ किलोमीटर लांबीच्या रस्त्यांचा ४२६ कोटी रुपयांचा स्वतंत्र आराखडा तयार करण्यात आला आहे.

यातील पहिल्या टप्प्यात माण डेपो ते हिंजवडी स्टेशनदरम्यानच्या मेगापॉलिस सर्कल ते वाकड पूल या दहा किलोमीटरच्या मेट्रो कॉरिडॉरलगतच्या रस्त्यांचा विकास केला जाणार आहे.

त्यापैकी ८.५ किलोमीटर रस्त्याचे काम एमआयडीसीमार्फत केले जाणार असून, त्यासाठी सुमारे २०० कोटी रुपये खर्च अपेक्षित आहे. या रस्त्यांवर पादचारी मार्ग, सायकल ट्रॅक, पथदिवे, अर्बन लाउंज, बसथांबे, ऑटो रिक्षा स्टँड तसेच भूमिगत युटिलिटी डक्ट उभारण्यात येणार आहेत.

२० रस्त्यांची सुधारणा
मेट्रो स्थानकांच्या ५०० मीटर ते १.५ किलोमीटर परिसरातील २० रस्त्यांच्या सुधारणेचाही या आराखड्यात समावेश आहे. या कामासाठी २२६.५४ कोटी रुपये खर्च अपेक्षित आहे. त्यात ‘पीएमआरडीए’च्या अखत्यारीतील ७.२२ किलोमीटर आणि एमआयडीसीच्या अखत्यारीतील ११.९७ किलोमीटर रस्त्यांचा समावेश आहे.

प्रमुख चौकांवरील वाहतूक कोंडी कमी होणार
एकूण ४५.३४ किलोमीटर रस्त्यांच्या विकासातून हिंजवडी परिसरातील वाहतूक व्यवस्थेत मोठा बदल होण्याची अपेक्षा आहे. भुजबळ चौक, भूमकर चौक, लक्ष्मी चौक, शिवाजी चौक आणि विप्रो सर्कल या प्रमुख चौकांवरील वाहतूक सुरळीत करण्यास या प्रकल्पामुळे मदत होणार आहे.

याशिवाय मेगापॉलिस सर्कल, क्वाड्रॉन सर्कल, डोहलर, इन्फोसिस फेज-२, विप्रो टेक्नॉलॉजीज, पॉल इंडिया, शिवाजी चौक आणि हिंजवडी स्टेशन या मेट्रो स्थानकांना परिसरातील रस्त्यांद्वारे थेट जोडणी मिळणार आहे. त्यामुळे आयटी पार्कमधील कर्मचारी तसेच स्थानिक नागरिकांचा मेट्रो स्थानकांपासून पुढील प्रवास अधिक सुलभ होण्याची अपेक्षा आहे.

TOP News: मनोज जरांगे मराठा समाजाची फसवणूक करत असल्याचा आरोप ते ड्रायव्हिंग लायसन्स रद्द होणार? जाणून घ्या आजच्या Top 10 News…