Hinjawadi News- वाहतुकीचे नियम मोडले की दंडाची पावती, मात्र हिंजवडीत नियमभंग करणाऱ्या वाहनचालकांना चक्क गुलाबाचे फूल देत वाहतूक शिस्तीचा संदेश देण्यात आला. महात्मा गांधी जयंतीनिमित्त हिंजवडी वाहतूक शाखेने राबविलेल्या या अनोख्या गांधीगिरी उपक्रमातून पोलिसांनी दंडापेक्षा जनजागृतीला प्राधान्य दिले. पोलिसांच्या या उपक्रमाला वाहनचालकांकडूनही सकारात्मक प्रतिसाद मिळाला. हिंजवडी परिसरात आयटी पार्कमुळे दररोज हजारो वाहनांची वर्दळ असते.

अशा परिस्थितीत वाहतूक नियमांचे उल्लंघन, सिग्नल तोडणे, हेल्मेटचा वापर न करणे, वेगमर्यादेचे उल्लंघन आणि बेशिस्त वाहनचालकांमुळे अपघातांचा धोका वाढतो. याशिवाय वाहतूक कोंडी आणि इतर वाहनचालकांनाही मनस्ताप सहन करावा लागतो. ही बाब लक्षात घेऊन वाहनचालकांमध्ये स्वयंशिस्त निर्माण करण्यासाठी हा उपक्रम राबविण्यात आला.

हिंजवडी वाहतूक शाखेचे पोलीस निरीक्षक राहुल सोनवणे यांच्या संकल्पनेतून पोलिसांनी नियमांचे उल्लंघन करणाऱ्या वाहनचालकांना थांबवून त्यांच्या चुकीची जाणीव करून दिली. मात्र, दंडात्मक कारवाई करण्याऐवजी त्यांच्या हातात गुलाबाचे फूल देत यापुढे वाहतुकीचे नियम पाळण्याचे आवाहन केले. स्वतःच्या सुरक्षिततेसोबतच रस्त्यावरील इतर नागरिकांच्या जीवाचीही काळजी घ्यावी, असा संदेश यावेळी देण्यात आला.

दंडाच्या भीतीने नव्हे, तर सामाजिक जबाबदारीच्या भावनेतून नियमांचे पालन व्हावे, हा या उपक्रमामागील मुख्य उद्देश होता. पोलिसांच्या या प्रेमळ पण प्रभावी भूमिकेमुळे वाहनचालकांमध्ये वाहतूक नियमांविषयी सकारात्मक दृष्टिकोन निर्माण करण्याचा प्रयत्न करण्यात आला. गांधीजींच्या अहिंसा आणि शांततेच्या विचारांना कृतीतून अभिवादन करणारा हा उपक्रम वाहतूक शिस्तीबाबत जनजागृती करणारा ठरला.