Hingoli: डिझेल-पेट्रोलच्या वाढत्या दरांबरोबरच इंधनटंचाईच्या निषेधार्थ क्रांतिकारी शेतकरी संघटनेच्या वतीने मंगळवारी गोरेगाव येथील चौफुली परिसरात पंतप्रधान नरेंद्र मोदी यांच्या प्रतिकात्मक पुतळ्याचे दहन करून तीव्र आंदोलन करण्यात आले. देशभरात डिझेल-पेट्रोलचे दर सातत्याने वाढत असून, सर्वसामान्य नागरिक तसेच शेतकऱ्यांना पेट्रोलपंपांवर तासन्तास रांगेत उभे राहावे लागत असल्याचा आरोप आंदोलनकर्त्यांनी केला. शासनाच्या चुकीच्या धोरणांमुळे सर्वसामान्य जनता त्रस्त झाली असून, शेती मशागतीच्या कामांवर त्याचा गंभीर परिणाम होत असल्याचे संघटनेच्या पदाधिकाऱ्यांनी सांगितले. इंधन टंचाईमुळे शेतकऱ्यांचा संताप – (Hingoli) पेरणीपूर्व मशागत, फवारणी आणि पाणीपुरवठ्यासाठी डिझेल अत्यावश्यक असताना शेतकऱ्यांना वेळेवर इंधन उपलब्ध होत नसल्याने संताप वाढत असल्याचे आंदोलनकर्त्यांनी म्हटले. यावेळी क्रांतिकारी शेतकरी संघटनेच्या वतीने शासनाला तातडीने ठोस उपाययोजना करून नागरिकांना, विशेषतः शेतकऱ्यांना, सुरळीत डिझेल-पेट्रोल उपलब्ध करून देण्याची मागणी करण्यात आली. अन्यथा राज्यभर तीव्र आंदोलन छेडण्याचा इशाराही संघटनेने दिला. आंदोलनादरम्यान शासनाविरोधात जोरदार घोषणाबाजी करण्यात आली. यावेळी मोठ्या संख्येने शेतकरी व नागरिक उपस्थित होते.