Hingoli school scam : हिंगोली जिल्ह्यातील सेनगाव तालुक्यातील कोळसा येथील विद्याशक्ती शिक्षण प्रसारक मंडळाने बनावट कागदपत्रे सादर करून शासनाची १ कोटी ९८ लाख रुपयांची फसवणूक केल्याचे प्रकरण विधानसभेत गाजले. या गंभीर प्रकरणाची दखल घेत बहुजन कल्याण मंत्री अतुल सावे यांनी दोषी संस्थाचालकांवर फौजदारी गुन्हे दाखल करण्याचे आणि वरिष्ठ सनदी अधिकाऱ्यामार्फत चौकशी करण्याचे आदेश दिले आहेत. भाजप आमदार तानाजी मुटकुळे यांनी लक्षवेधी सूचनेद्वारे हा घोटाळा सभागृहासमोर आणला. कै. लखन सर्जेराव नाईक इंग्रजी स्कूल या शाळेला प्रत्यक्षात २ मार्च २०२२ रोजी मान्यता मिळाली असताना, राजे यशवंतराव होळकर निवासी शाळा योजनेचा लाभ घेण्यासाठी २०१६ चा बनावट मान्यता आदेश जोडण्यात आला होता. तपासणीत हा आदेश पूर्णपणे बनावट असल्याचे उघड झाले. संस्थेने केवळ मान्यतेचाच नव्हे, तर इयत्ता दहावीच्या निकालाचाही बनावट पुरावा सादर केला. प्रत्यक्षात दुसऱ्या एका मराठी माध्यमाच्या शाळेचा निकाल या इंग्रजी शाळेचा असल्याचे दाखवण्यात आले. अशा प्रकारे कागदपत्रांत खाडाखोड करून आणि विद्यार्थ्यांची खोटी संख्या दाखवून विद्यार्थी शुल्काच्या नावाखाली तब्बल १ कोटी ९८ लाख रुपयांचा निधी शासनाकडून उचलण्यात आला. या घोटाळ्यामुळे शिक्षण क्षेत्रात खळबळ उडाली असून, मंत्र्यांनी या प्रकरणाच्या सखोल चौकशीचे आश्वासन दिले आहे.
