नांदेड : जातीय विखार आणि कौटुंबिक विरोधामुळे नांदेड शहरात एका प्रेमयुगुलाची प्रेमकहानी रक्ताने संपली. गुरुवारी (२७ नोव्हेंबर) संध्याकाळी ५.२० वाजता जुना गंजीपेठ परिसरात २४ वर्षीय सक्षम ताटे याची निर्घृण हत्या करण्यात आली. सक्षमच्या प्रेयसी आंचल मामीलवाड हिचे वडील गजानन बालाजीराव मामीलवाड, भाऊ साहील ठाकूर आणि त्यांचे साथीदार जयश्री मदनसिंह ठाकूर, सोमेश लखे, वेदांत यांनी मिळून प्रथम सक्षमवर गोळ्या झाडल्या आणि नंतर डोक्यात फरशी घालून त्याला ठार मारले. हृदय पिळवटून टाकणारी प्रेमकहाणी सक्षम आणि आंचल यांचे गेल्या तीन वर्षांपासून प्रेमसंबंध होते. सक्षम वेगळ्या जातीतला असल्याने आंचलच्या कुटुंबियांचा तीव्र विरोध होता. यापूर्वी सक्षमला धमकी देऊन आंचलपासून दूर राहण्यास सांगितले होते, तरीही दोघांचे प्रेम थांबले नाही. अखेर संतापाच्या भरात आंचलचे वडील आणि भाऊ यांनी हत्येचा कट रचला आणि अमलात आणला. हत्येनंतर सक्षमच्या पार्थिवावर अंत्यसंस्कारासाठी जेव्हा घरी आणले गेले, तेव्हा आंचलने उपस्थित सर्वांना हेलावून सोडणारे पाऊल उचलले.ती सक्षमच्या अंत्यसंस्कारासाठी त्याच्या घरी गेली होती. तेव्हा तिने सगळ्यांदेखत कपाळावर सक्षमच्या नावाचे कुंकू लावले, मंगळसूत्र घातले आणि मृत प्रियकरालाही हळद लावून लग्नाचे विधी पूर्ण केले. “माझे वडील आणि भाऊ हरले, मरूनही माझा प्रियकर जिंकला,” असे उद्गार काढत तिने उपस्थितांना ढसाढसा रडवले. आंचलने स्पष्ट शब्दांत सांगितले की, सक्षम जेलमधून बाहेर आल्यानंतरच तिच्या कुटुंबियांनी खुनाचा कट रचला होता. ती आपल्या वडिलांना आणि भावाला फाशीची शिक्षा होण्याची मागणी करत आहे. पोलिसांनी गजानन मामीलवाड, साहील ठाकूर, जयश्री मदनसिंह ठाकूर, सोमेश लखे आणि वेदांत या पाच जणांना अटक केली असून, खुनाचा गुन्हा दाखल करण्यात आला आहे. नांदेड शहरात या घटनेने प्रचंड खळबळ माजली आहे. माझा प्रियकर मरूनही जिंकला : आंचल यावेळी बोलताना आंचल म्हणाली की, सक्षम ताटे जेलमधून सुटून आल्यानंतर माझ्या कुटुंबातील लोक त्याच्या खूनाचा कट रचत होते. आमच्या प्रेमसंबंधाला विरोध असल्याने माझ्या वडिलांनी आणि भावाने सक्षमला मारले पण ते हरले आणि माझा प्रियकर मरून पण जिंकला. आपल्या वडिलांना आणि भावाला फाशीची शिक्षा व्हावी, अशी मागणी आंचलने केली आहे.
