नांदेड : नांदेड जिल्ह्यातील लोहा तालुक्यातील सावरगाव नसरत येथे कर्जबाजारीपणा आणि नापिकीमुळे २७ वर्षीय तरुण शेतकरी राहुल बेदरे याने १० जून रोजी शेतातील झाडाला गळफास घेऊन आत्महत्या केली. या धक्कादायक घटनेने त्यांचे वडील भीमराव बेदरे यांचा १२ जून रोजी मृत्यू झाला, तर आई शोभाबाई यांना हृदयविकाराचा झटका आला. सध्या शोभाबाई यांच्यावर रुग्णालयात उपचार सुरू असून, त्यांची प्रकृती स्थिर आहे. या तिहेरी संकटाने गावात शोककळा पसरली आहे.

बेदरे कुटुंबाकडे साडेतीन एकर कोरडवाहू शेती असून, भारतीय स्टेट बँकेकडून घेतलेले कर्ज आहे. भीमराव आजारपणामुळे अंथरुणाला खिळले होते, त्यामुळे कुटुंबाची जबाबदारी राहुलवर आली होती. शेतीतील नापिकी आणि वडिलांच्या आजारपणामुळे तो नैराश्यात होता. यातूनच त्याने आत्महत्येचा टोकाचा निर्णय घेतला. मुलाच्या मृत्यूचा आघात वडिलांना सहन झाला नाही, तर पती आणि मुलाच्या निधनाने शोभाबाई यांना हृदयविकाराचा झटका आला.

सावरगाव परिसरातील शेती पूर्णपणे कोरडवाहू आहे, आणि सिंचन सुविधांचा अभाव आहे. यामुळे शेतकऱ्यांचे सतत नुकसान होते. ग्रामस्थांनी बेदरे कुटुंबाला आर्थिक मदत आणि जवळच्या धोंड प्रकल्पातून पाण्याची सोय करण्याची मागणी सरकारकडे केली आहे. “शेतकऱ्यांच्या आत्महत्या थांबवण्यासाठी ठोस उपाययोजना हव्या,” अशी मागणी गावकऱ्यांनी केली. ग्रामस्थांनी पीडित कुटुंबाला आधार देत पुढाकार घेतला आहे, पण शासनाने तातडीने मदत आणि शेतकऱ्यांच्या समस्यांवर कायमस्वरूपी तोडगा काढावा, अशी अपेक्षा व्यक्त होत आहे.