Nanded News : दुष्काळामुळे पिकांचे नुकसान झाल्याने आणि सरकारी मदत न मिळाल्याने हतबल झालेल्या ४६ वर्षीय शेतकऱ्याने सोशल मीडियावर एक व्हिडिओ पोस्ट केल्यानंतर आत्महत्या केली. नांदेड जिल्ह्यातील (Nanded News) शंकर क्षीरसागर या शेतकऱ्याने या व्हिडिओद्वारे जिल्हाधिकाऱ्यांना भावनिक साद घालत, आपल्याला सरकारी दुष्काळ मदत किंवा कर्जमाफी योजनेचा लाभ का मिळाला नाही, असा प्रश्न उपस्थित केला होता.

क्षीरसागर हे शेतात असताना त्‍यांनी मोबाइलवर हा व्हिडिओ रेकॉर्ड करून तो ऑनलाइन पोस्ट केला. व्हिडिओमध्ये त्यांनी सांगितले की, अर्ज करूनही त्यांच्या मुलीच्या वैद्यकीय महाविद्यालयाची फी माफ झाली नाही, तर महाराष्ट्र सरकारने दुष्काळग्रस्त शेतकऱ्यांच्या मुलांसाठी फी सवलतीची घोषणा केली होती. पिकांचे नुकसान, डोक्यावर असलेले कर्ज आणि मुलीच्या शिक्षणाचा खर्च यामुळे प्रचंड आर्थिक तणावाखाली होते.

लिंबगाव पोलीस ठाण्याचे सहाय्यक पोलीस निरीक्षक बोधनकर यांनी सांगितले की, व्हिडिओ व्हायरल झाल्यानंतर त्यांचे कुटुंबीय आणि पोलीस त्यांचा शोध घेत होते. त्यानंतर, बोरगाव येथील त्यांच्या शेतात क्षीरसागर फाशी घेतलेल्या स्थितीत आढळले. नागपूरपासून सुमारे ३५७ किलोमीटर दक्षिणेस असलेल्या या भागात या घटनेमुळे मोठी शोककळा पसरली असून संतापाची लाट उसळली आहे.

दरम्‍यान, जानेवारी ते जून २०२६ या कालावधीत नांदेड जिल्ह्यात ६१ शेतकरी आत्महत्यांची नोंद झाली आहे. जून ते ऑगस्ट २०२६ या अवघ्या तीन महिन्यांत आणखी ३५ शेतकऱ्यांनी आत्महत्या केल्याची नोंद आहे. यामध्ये जूनमध्ये १४, जुलैमध्ये १३ आणि ऑगस्टमध्ये ८ शेतकऱ्यांचा समावेश आहे.