Health Minister Prakash Abitkar |  पुण्यातील दीनानाथ मंगेशकर रुग्णालयात प्रसुती दरम्यान तनिषा भिसे या महिलेचा मृत्यू झाल्याची धक्कादायक घटना घडली आहे. गर्भवती असेलल्या तनिषा भिसे यांच्या उपचारांसाठी कुटुंबियांकडून १० लाख रुपयांची मागणी करण्यात आली होती. पण पैशाअभावी वेळेत उपचार न दिल्याने तनिषा यांचा मृत्यू झाल्याचा आरोप त्यांच्या कुटुंबीयांनी केला आहे. या प्रकरणानंतर पुणे शहरात संतापाची लाट उसळून आली आहे.

या संपूर्ण प्रकरणावर आता राज्याचे आरोग्यमंत्री प्रकाश आबिटकर यांनी प्रतिक्रिया दिली आहे. ही घटना मन्न सुन्न करणारी असून चौकशी करण्यासाठी चार सदस्यीय समितीची स्थापन करण्यात आल्याची माहिती त्यांनी दिली. चौकशी अहवाल आल्यानंतर कायदेशीर कारवाई करण्यात येईल, असे देखील आरोग्यमंत्री प्रकाश आबिटकर यांनी माध्यमांशी बोलताना सांगितले.

दीनानाथ मंगेशकर रुग्णालयात ज्या पद्धतीने एका रुग्णाला अधिकचे पैसे भरले नाहीत, म्हणून उपचाराला जो उशीर झाला आणि त्यामुळे मन सुन्न करणारी घटना पुण्यात घडली. या संपूर्ण घटनेची पुण्याचे आरोग्य उपसंचालक आणि त्यांच्या अध्यक्षतेखाली समितीला आपण चौकशीचे आदेश दिले आहेत. या चौकशी समितीच्या माध्यमातून रुग्णालयाचे आणि त्या कुटुंबाचं जे काही म्हणणं आहे ते ऐकून घेतलं जाईल आणि त्यानुसार अहवाल समोर येईल. त्या अहवालानुसार कायदेशीर कारवाई केली जाईल, अशी प्रतिक्रिया आरोग्यमंत्री प्रकाश आबिटकर यांनी दिली आहे.