Pune : पोलिसांच्या धकाधकीच्या आणि तणावपूर्ण जीवनशैलीचा विचार करून महाराष्ट्र राज्य पोलीस मित्र संघटना आणि ‘विवान’ फाउंडेशनच्या वतीने शिवाजीनगर पोलीस ठाण्यात पोलिसांसाठी विशेष आरोग्य तपासणी शिबिराचे आयोजन करण्यात आले. या शिबिरात सुमारे १५० पोलीस अधिकारी व कर्मचाऱ्यांची विविध वैद्यकीय तपासणी करण्यात आली.

या शिबिराचे उद्घाटन सहाय्यक पोलीस आयुक्त चंद्रकांत भोसले यांच्या हस्ते झाले. यावेळी वरिष्ठ पोलीस निरीक्षक गिरीशकुमार देगावकर, महाराष्ट्र राज्य पोलीस मित्र संघटनेचे अध्यक्ष राजेंद्र कपोते, नगरसेवक अपूर्व खाडे, पोलीस निरीक्षक अमर काळगे, पोलीस निरीक्षक जगताप, पोलीस निरीक्षक रणदिवे तसेच ‘विवान’ फाउंडेशनच्या उषा धुमाळे-भालेराव आदी उपस्थित होते.

यावेळी बोलताना संघटनेचे अध्यक्ष राजेंद्र कपोते म्हणाले, “पोलिसांना सण-उत्सव, मोर्चे, दंगली, विविध मान्यवरांचे दौरे तसेच कायदा व सुव्यवस्था राखण्यासाठी सतत सज्ज राहावे लागते. वाहतूक पोलिसांनाही प्रदूषणाचा मोठा सामना करावा लागतो. त्यामुळे अनेकदा त्यांना स्वतःच्या आरोग्याकडे लक्ष देण्यासाठी वेळ मिळत नाही. यामुळे गंभीर आजार उद्भवण्याची शक्यता वाढते. त्यामुळे प्रत्येक पोलिसाने नियमितपणे आरोग्य तपासणी करून घेणे आवश्यक आहे.”

शिबिरामध्ये पोलीस अधिकारी, कर्मचारी आणि वाहतूक पोलिसांची दंत चिकित्सा, रक्तदाब, रक्तातील साखरेची तपासणी, कर्करोग तपासणी, नेत्र तपासणी आदी वैद्यकीय चाचण्या करण्यात आल्या. तसेच चष्म्यांचेही वाटप करण्यात आले.

या आरोग्य तपासणी शिबिरासाठी ताराचंद हॉस्पिटल आणि कस्तुरबा हॉस्पिटल यांनी सहकार्य केले.