Shweta Singh Kirti : बॉलिवूड अभिनेता सुशांत सिंह राजपूतच्या निधनाला सहा वर्षांचा काळ लोटला  आहे. मात्र, त्याच्या मृत्यूमागचे नेमके कारण काय होते, याबाबतचे गूढ आजही चाहत्यांच्या मनात कायम आहे. सुशांतची बहीण श्वेता सिंग कीर्ती सोशल मीडियाच्या माध्यमातून सातत्याने आपल्या भावाच्या आठवणी जपताना दिसते. सुशांतच्या आठवणी लोकांच्या मनात कायम राहाव्यात, अशी तिची इच्छा आहे. नुकत्याच दिलेल्या एका मुलाखतीत श्वेताने एक धक्कादायक अनुभव शेअर केला.

एका पॉडकास्टमध्ये श्वेताने सुशांतच्या आठवणींबाबत भावूक करणारा अनुभव सांगितला. ‘सुपरटॉक्स बाय द मुव्हिंगशिप’शी संवाद साधताना तिने सांगितले की, सुशांत अनेकदा तिला स्वप्नात दिसतो आणि त्याचा विचार आला की त्याची उपस्थिती जाणवते. ती त्याच्याशी बराच वेळ संवाद साधत असल्याचेही तिने सांगितले.

श्वेता भावाच्या अस्थी विसर्जनाच्या वेळचा एक धक्कादायक अनुभव शेअर करत म्हणाली , “पाटण्याला गेल्यानंतर ज्या खोलीत ती झोपली होती, त्याच खोलीत सुशांतच्या अस्थी ठेवण्यात आल्या होत्या. त्या रात्री सुशांत स्वप्नात आला आणि बराच वेळ माझ्याशी बोलला. त्याने मला मिठी मारली आणि गालाचे चुंबनही घेतले.”

…त्यावेळी माझे शरीर सुन्न झाले होते.

तसेच सुशांतच्या निधनाची बातमी कळल्यानंतर तिची काय अवस्था झाली होती. याविषयी बोलताना ती म्हणते “त्यावेळी मी कॅलिफोर्नियामध्ये होते. सुशांत आता हयात नाही हे ऐकताच माझे शरीर सुन्न झाले. मी आध्यात्मिक असल्यामुळे, जणू कोणीतरी माझ्यावर ध्यानाचे कवच पांघरले आहे असे मला वाटले. मी शांत होते. पण ते फार काळ टिकले नाही. मी मोठ्याने रडू लागले. माझ्या भावाच्या पार्थिवावर अंत्यसंस्कार होत होते. कोविडमुळे मी भारतात येऊ शकले नव्हते. मी त्याला अखेरचा निरोपही देऊ शकले नव्हते.” अशी खंत तिने व्यक्त केली.

‘धोनीने माझ्याशी संपर्क साधला नाही’ : श्वेता

सुशांत सिंह राजपूतने भारतीय क्रिकेटपटू महेंद्रसिंग धोनीच्या जीवनावर आधारित ‘एमएस धोनी: द अनटोल्ड स्टोरी’ या चित्रपटात धोनीची भूमिका साकारली होती. हा चित्रपट त्याच्या कारकिर्दीतील महत्त्वाचा टप्पा ठरला आणि त्याला मोठी लोकप्रियता मिळाली. सुशांतच्या निधनानंतर अनेक सेलिब्रिटींनी त्याच्या कुटुंबीयांशी संपर्क साधत संवेदना व्यक्त केल्या होत्या. मात्र, महेंद्रसिंग धोनीने तिच्याशी संपर्क साधला नाही, असा दावा तिने केला.

Sanjay Raut: “मोदींनी अमित शाह यांना उपपंतप्रधान करण्यास नकार दिला”; संजय राऊतांचा मोठा दावा