प्रभात वृत्तसेवा सोरतापवाडी – हवेली पंचायत समितीचे सभापतीपद सर्व साधारण आल्यामुळे तसेच कोरेगावमूळ पंचायत समितीचे आरक्षण सर्व साधारण आल्याने कोरेगावमूळ गणात उमेदवारी साठी चुरस वाढली असून राष्ट्रवादी काँग्रेस (शरद पवार गट) व राष्ट्रवादी काँग्रेस (अजित पवार गट ) यांच्यात लढत होणार असल्याची शक्यता आहे. भाजपने पण वेट अँड वॉचची भूमिका ठेवली असून, एक तरुण उमेदवार निवडून लढण्याच्या तयारीत आहेत. कोरेगावमुळ पंचायत समिती निवडणुकीसाठी दोन्ही राष्ट्रवादी काँग्रेस पक्षाकडून उमेदवारी मिळविणे हेच इच्छुकांसमोर मोठे आव्हान आहे. राष्ट्रवादी काँग्रेस अजित पवार गट व राष्ट्रवादी काँग्रेस शरद पवार गट यांच्यासमोर उमेदवाराला तिकीट देण्यासाठी मोठ्या जिकरीचे काम ठरत आहे. सध्या सर्व इच्छुक उमेदवार मतदारांच्या गाठीभेटी घेत असून प्रचाराचा जोरदार धडाका लावला आहे. या गणात इच्छुकांची संख्या मोठी आहे. कोरेगाव मुळ गणातून पंचायत समितीसाठी शिंदेवाडी, हिंगणगाव, कोरेगाव मूळ, टिळेकरवाडी, भवरापुर, खामगाव टेक, पेठ, प्रयागधाम नायगाव ही गावे येत असून इच्छुकांची संख्या जास्त आहे पेठचे आदर्श सरपंच सूरज चौधरी, नायगावचे माजी सदस्य कृष्णाआप्पा चौधरी, सोमनाथ चौधरी, दिपक चौधरी, योगेश साठे, बाळासाहेब साठे, टिळेकरवाडीचे सरपंच गोवर्धन टिळेकर, यांनी राष्ट्रवादी काँग्रेस (अजित पवार गट) पक्षाकडून मुलाखती दिल्या आहेत. तर राष्ट्रवादी काँग्रेस (शरद पवार गट) यांच्याकडून लवकरच मुलाखती घेण्यात येणार असून जनतेशी नाळ जोडणार्या इच्छुक उमेदवारांना संधी देण्यात येणार असल्याचे सांगितले जात आहे. भाजपकडून कोरेगाव मूळचे माजी सरपंच मंगेश कानकाटे हे निवडणूक लढण्यासाठी तयार आहेत. तर कोरेगाव मूळचेच माजी सरपंच विठ्ठल शितोळे हे सुद्धा निवडणूकीच्या तयारीला लागले आहेत. तर प्रितम शितोळे यांनी सुध्दा निवडणुकीसाठी दंड थोपटले आहेत. आता यामध्ये कृष्णाआप्पा चौधरी, मंगेश कानकाटे यांनी पक्ष देईल ती जबाबदारी स्विकारणार असल्याचे सांगितले. तर गोवर्धन टिळेकर व बाळासाहेब साठे यांनी सांगितले की निवडणूक लढवणारच. तर योगेश साठे यांनी सांगितले की पक्षाने जर तिकीट नाही दिले तर कार्यकर्ते, मित्रपरिवार व नातेवाईकांना विचारुन पुढील निर्णय घेण्यात येईल.पेठचे आदर्श सरपंच सूरज चौधरी यांनी सांगितले की पक्ष व स्थानिक लोक प्रतिनिधी नक्कीच विचार करुन मला संधी देतील असा विश्वास आहे. त्यामुळे सर्व पक्षात इच्छुक असून कोण कोणाचे तिकीट कापण्यात यशस्वी होऊन ऐनवेळी पक्षाचे तिकीट कुणाला मिळते याची उत्सुकता कोरेगावमूळ पंचायत समितीच्या निवडणूकीकडे लागली आहे.
