Gokul Election : कोर्टाचा निकाल विरोधात गेला तरी गोकुळवर महायुतीचीच सत्ता? बड्या नेत्याने सांगितला पुढचा प्लॅन
Gokul Election : कोल्हापूर जिल्हा सहकारी दूध उत्पादक संघ अर्थात ‘गोकुळ’च्या अध्यक्षपदाच्या निवडणुकीत महायुतीचे राजेश पाटील यांनी बाजी मारत सत्ता काबीज केली आहे.
Gokul Election : गोकुळ दूध संघाच्या अध्यक्षपदाच्या निवडणुकीत महायुतीचे राजेश पाटील विजयी झाले असून दूध संघाची सत्ता महायुतीच्या ताब्यात गेली आहे. राज्य सरकारने नियुक्त केलेल्या चार संचालकांनी राजेश पाटील यांच्या बाजूने मतदान केल्याने समविचारी आघाडीचे उमेदवार शशिकांत चुयेकर यांचा पराभव झाला. मात्र, या चार संचालकांच्या नियुक्तीचा वाद अद्याप न्यायालयात प्रलंबित असल्याने गोकुळच्या सत्तेचे भवितव्य अंतिम निकालावर अवलंबून आहे. (Gokul Election)
न्यायालयातील सुनावणीकडे लक्ष
चार शासननियुक्त संचालकांना मतदानाचा अधिकार देण्याच्या निर्णयाला शशिकांत चुयेकर यांनी आक्षेप घेतला आहे. या निर्णयाला स्थगिती देण्यास न्यायालयाने नकार दिला असला, तरी प्रकरणाचा अंतिम निकाल अद्याप लागलेला नाही. (Gokul Election)
मुंबई उच्च न्यायालयाच्या कोल्हापूर सर्किट बेंचमध्ये नोव्हेंबर महिन्याच्या अखेरच्या आठवड्यात या प्रकरणाची पुढील सुनावणी होणार असल्याचे सांगण्यात आले आहे. सरकार आणि समविचारी आघाडी या दोन्ही बाजूंकडून युक्तिवाद होण्याची शक्यता आहे. न्यायालय चार संचालकांची नियुक्ती वैध ठरवते की त्यांना दिलेला मतदानाचा अधिकार रद्द करते, याकडे सर्वांचे लक्ष लागले आहे. (Gokul Election)
निकाल विरोधात गेल्यास काय? मुश्रीफांनी सांगितली रणनीती
न्यायालयाने सरकारचा वटहुकूम रद्द केला किंवा चार संचालकांची नियुक्ती बेकायदेशीर ठरवली, तर गोकुळमध्ये पुन्हा अध्यक्षपदाचा पेच निर्माण होऊ शकतो. याबाबत मंत्री हसन मुश्रीफ यांनी महायुतीची संभाव्य भूमिका स्पष्ट केली. (Gokul Election)
“दुर्दैवाने न्यायालयाचा निकाल विरोधात गेला, तर पुन्हा तीच परिस्थिती निर्माण होईल. बारा संचालक बैठकांना अनुपस्थित राहतील आणि प्रशासक नेमण्याची वेळ येईल,” असे मुश्रीफ यांनी म्हटले आहे. (Gokul Election)
प्रशासक नेमला गेला तरी राज्यात महायुतीची सत्ता असल्याने गोकुळवरील नियंत्रण महायुतीकडेच राहील, असा दावा त्यांनी केला. समविचारी आघाडीच्या १३ संचालकांनाही त्यांनी अप्रत्यक्ष इशारा दिल्याचे त्यांच्या वक्तव्यावरून दिसून येते. प्रशासक नियुक्त झाल्यास शासनाकडून आपल्या बाजूचे संचालक राहतील, असेही मुश्रीफ यांनी सूचित केले. (Gokul Election)
गोकुळच्या सत्तेचा अंतिम फैसला न्यायालयाच्या निर्णयावर
सध्या राजेश पाटील यांच्या निवडीमुळे गोकुळची सत्ता महायुतीकडे आहे. मात्र, चार शासननियुक्त संचालकांच्या नियुक्तीचा आणि मतदानाच्या अधिकाराचा मुद्दा न्यायालयात प्रलंबित आहे. त्यामुळे अंतिम निकालानंतर सत्तेचे समीकरण बदलू शकते. (Gokul Election)
न्यायालयाचा निर्णय महायुती, समविचारी आघाडी आणि विशेषतः सतेज पाटील यांच्या पुढील राजकीय भूमिकेसाठी महत्त्वाचा ठरणार आहे. त्यामुळे गोकुळच्या सत्तासंघर्षाचा पुढील टप्पा न्यायालयीन निकालावर अवलंबून असेल. (Gokul Election)
