Ganesh Chaturthi : यंदा हरितालिका तृतीया आणि श्रीगणेश चतुर्थी 14 सप्टेंबर रोजी एकाच दिवशी येत आहेत. पंचांगानुसार 14 सप्टेंबरला तृतीया तिथी सकाळी 7 वाजून 7 मिनिटांनी संपणार आहे. त्यामुळे सूर्योदयाच्या वेळी तृतीया, तर दुपारच्या वेळी चतुर्थी तिथी असणार आहे. त्यामुळे दोन्ही व्रते एकाच दिवशी आली आहेत, अशी माहिती पंचांगकर्ते मोहन दाते यांनी दिली.

हरितालिका व्रतासाठी सूर्योदयाच्या वेळी तृतीया तिथी असणे आवश्यक असते. तर गणेश चतुर्थीसाठी चतुर्थी तिथी दुपारच्या वेळेत असणे महत्त्वाचे असते. त्यामुळे 14 सप्टेंबरला दोन्ही व्रतांची दिननिश्चिती होते.

हरितालिका पूजन सकाळी 7.07 पूर्वीच करावे किंवा त्यानंतर गणेशपूजन करावे, असा नियम नाही. तृतीया संपण्यापूर्वी किंवा त्यानंतरही हरितालिका पूजन करता येईल. तसेच सकाळी 7.07 पूर्वीही गणेश चतुर्थीनिमित्त पार्थिव गणेशाची पूजा करता येणार आहे. दोन्ही व्रतांचे कर्ते वेगवेगळे असल्याने पूजा आधी किंवा नंतर करण्यास अडचण नाही. उषःकालापासून मध्याह्नापर्यंत पूजेचा मुख्य काल मानला जातो.

हरितालिकेचा उपवास 14 सप्टेंबरला दिवसभर करावा आणि 15 सप्टेंबरला सोडावा. ज्यांना ऋषिपंचमीचाही उपवास करायचा आहे, त्यांनी 15 सप्टेंबरला सकाळी हरितालिकेची उत्तर पूजा करून विसर्जन करावे. त्यानंतर भाताच्या एका घासाचा वास घेऊन हरितालिकेचा उपवास सोडावा आणि त्याच दिवशी ऋषिपंचमीचा उपवास नेहमीप्रमाणे करावा, असे मोहन दाते यांनी सांगितले.

यापूर्वी 2006 आणि 2009 मध्येही हरितालिका आणि गणेश चतुर्थी एकाच दिवशी आल्या होत्या.