Hardik Pandya Heartwarming Gesture for Fan Who Walked Over 1000 Km to Bengaluru : भारतीय क्रिकेट संघाचा स्टार अष्टपैलू खेळाडू हार्दिक पंड्या सध्या दुखापतीमुळे राष्ट्रीय संघाबाहेर असला, तरी त्याची प्रचंड लोकप्रियता आजही कायम असल्याचे पुन्हा एकदा सिद्ध झाले आहे. हार्दिकला प्रत्यक्ष भेटण्यासाठी एका निष्ठावंत चाहत्याने तब्बल १००० किलोमीटरहून अधिक अंतर पायी चालत पार केले. बंगळुरूत पोहोचलेल्या या चाहत्याची निराशा न करता हार्दिकने अत्यंत आदराने आणि आपुलकीने त्याची भेट घेतली. त्याच्या प्रकृतीची विचारपूस करत हार्दिकने त्याच्या घरापर्यंतच्या परतीच्या प्रवासाचे रेल्वे तिकीट काढून देण्याचे मोठे आश्वासन दिले आहे.

लखनौ ते मुंबई आणि तिथून बंगळुरूपर्यंतचा थरारक पायी प्रवास –

लखनौ येथील रहिवासी असलेल्या रवी कुमार रावत या तरुणाने आपल्या लाडक्या क्रिकेटपटूला भेटण्यासाठी हा थक्क करणारा प्रवास केला. हार्दिकला भेटण्याच्या उद्देशाने रवी सुरुवातीला लखनौहून चालत मुंबईत दाखल झाला होता; मात्र हार्दिक बंगळुरू येथे असल्याचे समजताच त्याने जराही हार मानली नाही. त्याने मुंबईहून थेट बंगळुरूच्या दिशेने पायी चालण्यास सुरुवात केली. अशा प्रकारे १००० किलोमीटरपेक्षा जास्त अंतर कापून तो अखेर बंगळुरू येथील बीसीसीआयच्या सेंटर ऑफ एक्सलन्स येथे पोहोचला.

हार्दिकने जिंकले मन; परतीच्या प्रवासाचा खर्च उचलण्याची तयारी –

 

View this post on Instagram

 

सोशल मीडियावर सध्या या भेटीचा एक भावूक व्हिडिओ तुफान व्हायरल होत आहे. या व्हिडिओमध्ये हार्दिक आपल्या या चाहत्याशी अत्यंत प्रेमाने संवाद साधताना दिसत आहे. हार्दिकने रवीला विचारले की, “तुला कशाची गरज आहे का आणि मी तुझ्यासाठी काय मदत करू शकतो?” हार्दिकने त्याला स्वतःच्या घरी लखनौला सुरक्षित परत जाण्यासाठी रेल्वे तिकिटांची संपूर्ण व्यवस्था करून देण्याचा शब्द दिला. तसेच भविष्यात कोणतीही अडचण आल्यास थेट संपर्क साधण्यास सांगितले.

हेही वाचा –  Sai Kishore Hat-trick : साई किशोरच्या हॅटट्रिकच्या जोरावर तमिळनाडूचा उत्तराखंडवर दणदणीत विजय! एक डाव आणि ६६ धावांनी केली मात

सेंटर ऑफ एक्सलन्समध्ये हार्दिकची फिटनेससाठी धडपड –

सध्या हार्दिक पंड्या दुखापतीतून सावरण्यासाठी बंगळुरूतील बीसीसीआयच्या सेंटर ऑफ एक्सलन्समध्ये रिहॅबिलिटेशन प्रक्रियेतून जात आहे. भारताच्या मर्यादित षटकांच्या संघात हार्दिकची अष्टपैलू भूमिका अत्यंत कळीची मानली जाते. मैदानावरील पुनरागमनासाठी तो सध्या घाम गाळत असताना, मैदानाबाहेर चाहत्याप्रती दाखवलेल्या या संवेदनशील आणि दिलदार स्वभावामुळे क्रीडा जगतातून त्याच्यावर कौतुकाचा वर्षाव होत आहे.