हडपसर (प्रतिनिधी) – गेली पाच वर्षे सर्वसामान्य जनतेसाठी आमदार चेतन तुपे पाटील हे नेहमीच उपलब्ध राहिले आहेत. येणाऱ्या प्रत्येकाचे प्रश्न त्यांनी मार्गी लावले आहेत. हडपसरचा सर्वांगीण विकास हेच त्यांचे नेहमी ध्येय आहे. म्हणूनच हडपसरची जनता त्यांच्या पाठीशी आहे. जनतेच्या पाठिंब्यानेच चेतन तुपे पाटील यांचा विजय निश्चित आहे, असा विश्वास माजी महापौर वैशाली सुनिल बनकर यांनी व्यक्त केला. हडपसर विधानसभा मतदारसंघाचे महायुतीचे अधिकृत उमेदवार चेतन विठ्ठल तुपे पाटील यांच्या प्रचारार्थ आयोजित पदयात्रेत त्यांनी हे मनोगत व्यक्त केले.

Pune: हडपसरमधील लाडक्या बहिणी चेतन तुपे यांच्या पाठीशी…

हडपसरच्या विकासाची वाटचाल अधिक गतिमान करण्यासाठी मी सातत्याने प्रयत्नशील आहे. या भागाचा भूमिपुत्र, इथल्या मातीशी एकरूप झालेला हक्काचा माणूस म्हणून मी सदैव तत्पर आहे. आजवर तुमच्या न्याय्य हक्काचे प्रश्न देखील प्रसंगी मी रोखठोक भूमिका घेत विधिमंडळात मांडले आहेत. तुमच्या प्रतिसादातून मला त्याची पोचपावती मिळते आहे. माझ्या हडपसरची जनता अनुक्रमांक एक वरील माझ्या घड्याळ या चिन्हासमोरील बटण दाबून मला पुन्हा एकदा विकासात्मक कामांसाठी निवडतील.” असा विश्वास उमेदवार चेतन तुपे यांनी यावेळी व्यक्त केला.

रेल्वे उड्डाणपूल, मांजरी बुद्रुक व खुर्द गावांना जोडणारा मुळा- मुठा नदीवरील पूल ,मांजरी फाटा ते महादेवनगर मार्गे मांजरी मुख्य रस्ता, मांजरी पाणी योजना, केशवनगर – मांजरी रस्ता ही कामे मार्गी लावली आहेत. याशिवाय पुढील काळात या गावात उद्याने,अभ्यासिका, विरंगुळा केंद्र, सुसज्ज आरोग्य केंद्र करण्यासाठी मी कटिबद्ध आहे.
– चेतन तुपे पाटील (आमदार ,हडपसर विधानसभा)

हडपसर गाव, मगरपट्टा, गाडीतळ, उन्नती नगर, सातववाडी, गोंधळेनगर या भागातून ही पदयात्रा व दुचाकी यात्रा झाली. यावेळी पुणे महानगर पालिकेच्या माजी महापौर वैशाली बनकर, माजी नगरसेवक मारुती आबा तुपे, माजी नगरसेविका उज्वला जंगले, माजी नगरसेविका विजया कापरे, नलिनी मोरे, सुनील बनकर, सोमनाथ तुपे, विजय मोरे, डॉ. शंतनू जगदाळे, अभिमन्यू भानगिरे, नितीन होले, सागर राजे भोसले, कलेश्वर घुले, योगेश सूर्यवंशी, विठ्ठल विचारे, सतीश शिंदे, दत्ता जगताप, सतीश भिसे, शालिनी जगताप, अश्विनी वाघ, रोहिणी क्षीरसागर, स्नेहल कांबळे यांच्यासह महायुतीचे स्थानिक पदाधिकारी, कार्यकर्ते व नागरिक मोठ्या संख्येने उपस्थित होते.