पुणे – राज्याच्या उच्च शिक्षण विभागातर्फे दिल्या जाणाऱ्या २०२२-२३ च्या ज्ञानज्योती सावित्रीबाई फुले पुरस्कारांची घोषणा करण्यात आली आहे. प्रत्येक महसूल विभागातून एक अशा सहा पुरस्कारर्थी महिलांची नावे जाहीर झाली आहेत. ज्ञानज्योती सावित्रीबाईनी केलेल्या कार्याचा उचित गौरव व स्मरण व्हावे यादृष्टीने व पुढील काळात त्यांच्या कार्यास अधिक गती मिळावी या हेतूने समाजिक समता, स्त्री शिक्षण, कमकुवत गटातील मुला-मुलीचे शिक्षण या व अशा क्षेत्रात सेवावृत्तीने कार्य करणाऱ्या महिलांना ज्ञानज्योती सावित्रीबाई फुले पुरस्कार देण्यात येतो. या पुरस्कारासाठी पुणे विभागातून आंबेगाव तालुक्यातील उगलेवाडी येथील जनाबाई उगले यांची तर नाशिक विभागातून अहिल्यानगर, संवेडी येथील प्राजक्ता कुलकर्णी यांची निवड करण्यात आली आहे. कोकण विभागातून नेरूळ येथील फुलन शिंदे यांची तर छत्रपती संभाजीनगर विभागातून सोयगाव तालुक्यातील शिवाजीनगर आमखेडा येथील मीनाक्षी बिराजदार यांची तसेच अमरावती विभागातून बुलढाणा जिल्ह्यातील मेहकर तालुक्यातील बालाजीनगर येथील वनिता अंभोरे यांची आणि नागपूर विभागातून शालिनी सस्केना यांची निवड करण्यात आली आहे. हा पुरस्कार वितरण समारंभ येत्या १० मार्च रोजी मुंबई येथील श्रीमती नाथीबाई दामोदर ठाकरसी महिला विद्यापीठातील सर सिताराम तथा लेडी शांताबाई पाटकर दीक्षांत सभागृहात सांयकाळी ४ वाजता होणार आहे. उच्च व तंत्र शिक्षण मंत्री चंद्रकांत पाटील, राज्यमंत्री इंद्रनील नाईक, जेष्ठ पार्श्वगायिका पद्मश्री अनुराधा पौडवाल यांच्या हस्ते पुरस्कार प्रदान करण्यात येणार आहेत.
