Gulab Chand Kataria : पंजाबचे राज्यपाल गुलाबचंद कटारिया (Gulab Chand Kataria) यांनी मंगळवारी एका गंभीर आरोपाद्वारे खळबळ उडवून दिली आहे. सीमेपलीकडून पंजाबमध्ये ड्रोनद्वारे होणारी अमली पदार्थ आणि शस्त्रास्त्रांची तस्करी केवळ पाकिस्तानचे काम नसून, यामध्ये मोठ्या परकीय शक्तींचा सहभाग असल्याचा दावा त्यांनी केला आहे. राज्याला अस्थिर करणे आणि तरुणाईला अंमली पदार्थांच्या जाळ्यात ओढणे हा यामागचा मुख्य उद्देश असल्याचे त्यांनी म्हटले आहे. होशियारपूर येथे पत्रकारांशी बोलताना राज्यपाल कटारिया (Gulab Chand Kataria) म्हणाले की, एकट्या पाकिस्तानकडे सातत्याने एवढ्या मोठ्या प्रमाणावर अमली पदार्थ आणि शस्त्रास्त्रांच्या खेपा पाठवण्याची क्षमता नाही. यामध्ये काही मोठ्या परकीय शक्ती पाकिस्तानला रसद आणि तांत्रिक मदत पुरवत असाव्यात, जेणेकरून भारतातील शांतता भंग करता येईल. मात्र, आमचे सुरक्षा दल सक्रिय असून असे अनेक प्रयत्न हाणून पाडले जात आहेत. ड्रोनविरोधी यंत्रणा अधिक मजबूत केली जात आहे, असे त्यांनी स्पष्ट केले. मंगळवारी राज्यपालांनी होशियारपूरमधील डीएव्ही कॉलेज ऑफ एज्युकेशन येथून पीपल्स अगेन्स्ट ड्रग्ज वॉक या पदयात्रेचे नेतृत्व केले. पंजाब लिट फाउंडेशनद्वारे आयोजित या उपक्रमाची यंदाची संकल्पना मदर्स अगेन्स्ट ड्रग्ज (अंमली पदार्थांविरुद्ध माता) अशी होती. ही पदयात्रा शहरातील मुख्य बाजारपेठांमधून काढण्यात आली, ज्यामध्ये विद्यार्थी, स्वयंसेवी संस्था आणि सामाजिक संघटनांचे प्रतिनिधी मोठ्या संख्येने सहभागी झाले होते. जनआंदोलनाची हाक अंमली पदार्थांच्या विरोधातील मोहीम ही केवळ राजकीय नसून ती एक लोकचळवळ बनली पाहिजे, असे आवाहन राज्यपालांनी केले. विशेषतः शैक्षणिक संस्थांना ड्रग्जमुक्त करण्यावर त्यांनी भर दिला, कारण राज्याचे भवितव्य तरुणांच्या हातात आहे. पंजाब सरकारच्या वॉर अगेन्स्ट ड्रग्ज या मोहिमेचे त्यांनी कौतुक केले आणि यात ग्राम संरक्षण समित्यांनी देखील गावपातळीवर सतर्क राहण्याचे आदेश दिले.
